Integriteitskamer ta un proyecto cu pa hopi aña caba ta wordo traha ariba, caminda diferente estudio a wordo haci pero e momento pa el a wordo implementa pero aki ta trata di un asunto serio y no a ser logra, Parlamentario Arthur Dowers di fraccion di AVP a declara.
Sinembargo sr Dowers a mustra, mirando ponencianan di Prome Minister Wever Croes, kende a declara siman pasa cu lo a detene varios persona kendenan ta meti den corupcion y cu e hendenan aki a sigui ehempel di ministernan, e ta kere cu esaki ta un cos sumamente baho pa e bisa.
“Mi ta bisa esaki pa motibo cu e corupcion den e ambtelijke apparaat ta un cos di tur tempo caminda nos conoce varios caso chikito y grandi di personanan cu a wordo deteni, cu a wordo persigui pa diferente motibo y pa comete actonan di corupcion den e aparato gubernamental.
Nos traha sumamente duro ultimo añanan na fortifica e departamentonan y mi a tende un minister declara cu tabatin 2 mil florin so pa Landsrecherche biaha.
Ta un declaracion sumamente ridiculo ya cu Landsrecherche su trabou no ta di biaha, Landsrecherche su trabou ta di haci investigacion hustamente riba violacionna di integridad.
Tin varios caso cu a wordo resolve y tin casonan cu a wordo haci asina rafina caminda no ta logra pone man riba e persona pero en todo caso ta un tema cu semper, en todo caso bou di nos gobernacion y bou di mi responsabilidad como Minister di Justitie a tuma esaki hopi na serio y atende cu tur caso.
Ministerio Publico a haya moda pa traha y ta conoci aki na pais Aruba cu na momento den pasado ministerio publico kier a haci investigacion bou gobierno di MEP, algo cu ta wordo papia no solamente na Aruba pero hasta den circulo na Hulanda, ta cu a debilita ministerio publico caminda e tempo ey a corto begroting di ministerio publico, corta cantidad di fiscalnan den ministerio publico cu nan no por a investiga ni crimen den e pais, corda pa investiga e situacionnan di integridad cu tabata tuma luga bou gobierno di MEP.
Ora c’un Minister Presidente bin pafo y bisa cu e ambtenaar ta sigui ehempel di e ministernan, mi ta puntra mi mes si su mesun primo cu durante di mi responsabilidad como minister tambe a wordo deteni pa violacion di actonan di integridad, ta ken su ehempel el a sigui?
Tin varios otro ambtenaar cu casonan grandi cu nos por corda caminda cu e ambtenaarnan a wordo deteni y a wordo persigui y hasta a wordo condena pa violacion di integridad.
Pesey mi ta haya cu ta un asunto sumamente di muchachada y poco seriedad pa bin afo como minister presidente y c’un tema asina serio, bin haci e tipo di acusacionnan aki.
Di otro banda mi ta bisa cu si bo ta serio, con bo por bisa cu bo a haci denuncia contra di un persona, kende tabata forma pati di e gobierno anterior, pasobra nan ta blo grita cu 8 aña largo tabatin politiconan ta horta pero na mes momento 8 aña largo e mesun hendenan di MEP aki a bin ta acusando un persona di ta horta.
Pero cu kende partido MEP a bay forma un gobierno di ‘strawberry’ cune, ta cu mesun persona aki anto mi ta puntra mi mes, abo como prome minister ta bin papia di integridad?
Sorry señora pero integridad ta cuminsa na bo mes y si bo kier duna ehempel di integridad anto bo no mester a forma un gobierno cu c’un persona cu bo mes a crea masha hopi duda den su integridad, kende bo a haya pa corupto y hasta boso a haci un denuncia na ministerio publico.
Nos lo keda pendiente pa nos mira con e asunto di integridad aki ta bay cana y nos ta hopi entusiasma pa bay mira kende ta bay den e comision aki y sigur kico e ta recomendacionnan cu nan ta bay bin cune pasobra misa ya cu mi ta parti di henter e proceso aki den diferente rapport cu a wordo traha y diferente persona cu a contribui pa yega un dia na un integriteitskamer.
Otro cos cu mi kier recorda prome minister Wever Croes ta cu el a acusa AVP su integrantenan cu nan lo tabatin contacto cu hendenan cu segun su persona no tabata integro, pero nos sa cu su partido, no su persona so pero otronant tambe y tin potret di esaki tambe, caminda por ehempel un politico di Corsou kende a wordo condena juist pa violacion flarrante di reglanan di integridad, tabata na su cas, riba jeep ta campañando cu nan, brasando otro pues a sostene MEP ampliamente nan su campaña, y awor ta mustra cu e persona ey pa prome minister ta sumamente integro pasobra cu ta amigo di Evelyne Wever Croes y di MEP.
E ora nos tin cu puntra nos mes ta ki sorto di camber di integridad nos ta bay haña y mi ta spera cu ta un camber di integridad caminda un bes bo ta geel, bo ta integro y si bo no ta forma parti di e partido geel, anto e ora tur otro hende no ta integro mas.
Tin casonan caminda por ehempel otro primo y awor formando parti di gobierno di MEP aworaki, den publicacionnan internacional a Sali den prensa como amigo di un persona sentencia na Merca pa labamento di placa di droga y tambe pa motibo di ta financia terorismo y ta cosnan cu prome minister mester tuma na consideracion tambe si e kier papia di integridad,” Parlamentario Arthur Dowers a mustra.
