Gabinete Wever Croes ya no ta importa su mes pa e hende ta central ya cu te ainda e hende no a ser poni central ya cu ora cu ranca placa di cartera di pueblo, di hendenan cu ta lucha pa nan cubra gastonan di tur dia, loke ta conta ta pa gobierno MEPPORRED ta placa y mas placa.
Lider di fraccion di AVP, sr Marlon Sneek ta mustra cu despues cu gobierno a castiga pueblo y lo sigui castiga ainda mas, dos minister di e coalicion aki, a bay di acuerdo pa bay saca placa awor for di turistanan cu medidanan sin misericordia tambe.
Minister di turismo, Dangui Oduber y minister encarga cu Serlimar Otmar Oduber, a uni forsa pa saca miyones extra for di turistanan, pa colmo cu medidanan sin sentido caminda e turista lo tin cu paga dos bes pa mesun servicio.
“Ya caba nos a mira con minister di turismo a dicidi di impone un aumento di ‘airporttax’ cu 40%, algo sin precedente y cu sigur lo bay bin su impacto directo of indirecto riba e industria turistico y pa completa obra, gobierno MEPPORRED pa medio di minister di Serlimar en cooperacion cu minister di turismo, a bay di acuerdo pa cobra tur turista cu pone pia riba tera na Aruba, paga e suma di $3 pa asina cubri recogemendo di sushti.
Si esey ainda no ta suficiente, tur dos minister y nan gobierno a bay di acuerdo pa impone un cobransa pa recogemento di sushi adicional na tur hotel, pues den cierto sentido e turista lo bay tin cu paga dos bes pa recogemente di sushi.
Ta cosnan cu simplemente no tin hustificacion, ta mustra mas bien riba decisionnan sin pia ni cabes y ta mustra un desesperacion di un gobierno pa haya mas placa pa atende asuntonan cu ta regarda mas tanto interes di amigo y sponsornan cu a yuda durante di campaña electoral.
Serlimar ya caba ta wordo subsidia pa gobierno, minister di Serlimar ya for di luna di juli tabata kier a haya un suma di 10 miyon adicional riba otro suma adicional cu e tras fraccionan cu ta sostene gobierno a duna e minister y awor ta bay pa algun extra miyon cobrando hotel- y turistanan pa e servicio di recogemento di sushi.
E ansha pa placa aki no ta cabando, e hamber pa haya placa for di pueblo y awor for di turistanan, ta sigui su curso sin cu gobierno ta realisando e peso enorme cu ta wordo poni riba entrada di famianan y awor riba gastonan di estadia di turistanan.
Ya caba por sinti e inkietud den pueblo caminda ta sperando riba aumento di awa y coriente cu ta inevitabel y cu lo bay aumenta ainda mas nan problema financiero di gastonan di cas mientras cu esaki lo tin un efecto di cadena pa aumento di otro gastonan adicional den e sector comercial.
Sinembargo te ainda gobierno no ta haciendo algo pa alivia un problema financiero cu e mes a ocasiona riba pueblo, tin un minister di asuntonan social cu a priminti aumento di salario minimo y kende no kier papia riba e tema aki mas y pa colmo e tin un suma di 17 miyon poni un banda sin cu el a haci algo cu e placa aki.
Minister aki ta tratando cu ayudo di e tres fraccionnan den Parlamento pa bay crea un fondo pa pone e placa aki den e fondo aki pa asina e lo tin esaki na su disposicion mientras cu e ta culpa otronan pa su incapacidad di atende cu plan social cu tanto el e priminti pueblo di lo haci.
Na mes momento cu gobierno ta rancando placa for di pueblo y awor turistanan tambe, tin ministernan cu ta sigui tuma hende den servicio den varios departamento apesar cu CAFT a informa gobierno cu den e presupuesto supletorio 2018, mester keda cla con gobierno lo reduci su gasto di personal cu 12 miyon florin, algo cu ta mustrando practicamente imposibel,” Parlamentario Marlon Sneek di fraccion di AVP a declara.
