Gobierno MEPPORRED a decretal un ‘crisis social’ y pa miembro di Parlamento Arthur Dowers, ta algo bergonsoso pa mira con minister encarga cu asuntonan social bin parlamento, y hiba un tipo di ‘show y mas’ pero sr Dowers loke minister a bin haci den parlamento, ta parce un certamen di Reina caminda cada minister a haya oportunidad pa cana y repasa loke nan ta haciendo sperando cu nan fraccionnan lo duna nan un punto positivo.
“Un minister di asuntonan social si e por ta serio, of si e ta compronde kico e ta haciendo, e no por bin den parlamento y bisa cu ‘crisis social ta debi na gobierno anterior cu a redobla debe.’
Cu otro palabra minister Glendert Croes ta bisa parlamento y pueblo di Aruba, cu e gobierno di AVP pa motibo di e percura pa tin miho vivienda pa nos hendenan den e pais aki, manera tur hende por corda casnan di pueblo tabata cay riba hende di e estado deplorabel cu nan tabata aden y nos a drecha esaki pero esey a crea crisis social.
Gobierno di AVP a percura pa aumenta onderstand pa esunnan cu tin menos recurso riba e isla aki y segun minister Glenbert Croes, esey a contribui na crisis social.
Nos gobierno a percura pa introduci ‘leerplicht’ y esey tambe a contribui na crisis social, y gobierno a percura pa controla y pa tin instrumento ora cu muchanan ta wordo abusa, teni den nan cas y stroba den nan desaroyo, cu nan por haya enseñansa y esey a contribui na crisis social.
Nos tin cu puntra nos mes e ora ta ki sorto di minister Glenbert Croes ta, ki sorto di informacion e minister aki tin y hasta ki tipo di formacion e minister aki tin, pa e por papia e tipo di spectacel cu el a bin papia den parlamento.
Ta un berguensa grandi pa un gobierno cu ta yama su mes social democrata, nan no sa kico ta social y nan no sa kico ta crisis tampoco.
Si tene cuenta cu e pais aki a conoce un situacion pio cu e situacion cu tin na e momentonan aki ta dificil pa kere c’un minister tin conoce algo di e materia aki, por bin papia algo asina den parlamento.
Minister Glenbert Croes a bisa cu el a bin parlamento pa splica y duna informacion pasobra pueblo mester haya sa kico nan ta haciendo pero tur siman tin conferencia di prensa, y hasta na e momentonan ey mes nan no tin nada pa informa pueblo di loke nan ta haciendo.
Nan ta simplemente reacciona riba loke ta pasando den comunidad pero te ainda pueblo no por a scucha algo di e gobierno aki cu tin contenido riba loke nan ta haciendo como gobierno.
Si e minister bin parlamento anto e ta serio, e minister tin cu manda documentonan caminda e por mustra rapportnan cu a wordo traha dor di gruponan nacional y internacional cu a analisa e situacion por ehempel di nos muchanan.
E rapportnan aki ta existi y e minister mester informa parlamento riba contenido di e rapportnan caminda entre otro ta ser mustra cu tin cierto retonan pa loke ta trata desaroyo di nos muchanan den e pais aki y desaroyo di nos hubentud.
Minister mester bisa kico ta e intervencionnan cu el a haci directamente pa contribui na e desaroyonan ey cu a wordo señala den e rapportnan, con ta manda un desaroyo negativo pa un desaroyo positivo.
Nada di esaki a tuma luga, riba nada di esaki minister Glenbert Croes a duna informacion pero a bin grita cosnan populista, papia cosnan cu no tin sentido, y tur loke esunnan di menos recurso tin awe, ta loke AVP a percura pa nan haya y partido MEP no a atende mes cu e hendenan aki.
Loke gobierno di AVP a laga atras ta visibel tur caminda, tur desaroyo, tur atencion pa nos hendenan kendenan awe ta wordo confronta c’un berdadero crisis cu gobierno di Glenbert Croes a crea cu ta un crisis real, sin duna nos hendenan algo al cambio y ta solamente papia cu tur hende mester haci sacrificio, pero amigo- y famianan ta wordo beneficia.
Ta na su luga pa mustra minister Glenbert Croes y su persona den pasado tambe a forma parti di e ayudo social di gobierno di AVP, ora cu na momento cu gobierno di su actual partido MEP a hinca su persona den un situacion social delicado, a dun’e un man pa e por a sigui desaroya su mes y esey tampoco por ta parti di e crisis social cu su persona ta papia ariba,” Parlamentario Arthur Dowers a splica.
