Ora cu scucha Presidente di sindicato SEPPA declara na prensa cu minister di infrastructura Oduber a informa e sindicato cu su persona no sa di con fraccion di MEP a manda yama su persona pa aclaria diferente punto, relaciona cu e decision cu el a tuma siman pasa pa introduci cobransa pa recogemento di sushi.
Lider di fraccion di AVP, sr Marlon Sneek a mustra cu ta mesun gobierno cu tin transparencia y integridad como e base di su gobernacion, ta bira transforma e organo cu mester controla su maneho, den un tipo di poppenkast, manipulando cu nan ora cu un of otro minister ta haya ta bon.
El a sigui mustra cu diahuebs ultimo lider di fraccion na nomber di e fraccion di MEP a manda yama minister di infrastructura pa e duna splicacion y aclaracion riba e decision di e minister pa introduci cobransa pa recogemento di sushi, apesar cu e mesun fraccion di MEP aki, a aproba presupuesto 2018 den cual tur gasto di Serlimar ta wordo cubri, parlamentario Sneek ta trece dilanti.
“No solamente e gastonan aki ta den presupuesto 2018 caba pero minister Oduber a pidi 5 miyon extra pa Serlimar loke tambe el a haya y ora cu nota cu e departamento aki ta haya casi 100% mas cu e el a haya den presupuesto 2017, tog e minister kier saca mas placa for di pueblo sin duna splicacion kico e ta bay haci cu e placa aki.
Tambe no tin mucho claridad pa pueblo ta con e minister kier cobra e pikimento di sushi, ya cu no tin claridad con ta cobra esaki, si ta pa cada cas y sin ta conta salario di tur hende den cas hunto pa determina cuanto cada cas tin cu paga.
Na final di dia MEP a dobla rabo pa minister y a cancela e reunion, lider di fraccion di MEP sr Rocco Tjon a bisa bon cla cu aki no ta cuestion si ta bay cobra si of no, pero nan kier sa kico minister a haci cu e 5.4 miyon cu el a haña extra pa Serlimar y awor ta bisa cu a cancela e reunion paso minister a bisa cu e no ta bay cobra mas per 1 juli.
Esaki ta di lamenta paso mi a spera hopi mas di e parlamentario nobo aki en todo caso mi no a spera cu e lo a spanta y cancela e reunion,” lider di fraccion di AVP, Marlon Sneek a declar.
