Den seno di partido MEP mes, sigur cerca sostenedonan, ta reina un mal contento formal pa e forma con por tuma nota cu nan no ta di acuerdo cu e maneho cu e ministernan di gabinete Wever Croes ta hibando.

Lider di fraccion di AVP, sr Marlon Sneek ta mustra cu e mal contento aki por wordo destila for di e hecho cu documentonan a cuminsa wordo manda den forma anonimo pa tanto mediona di comunicacion como pa miembrona di fraccion di AVP pa decisionnan cu a wordo tuma y caminda por ripara cu e linia geel di goberna primeramente ta pa ‘friends & family & ex family’ ta mas bibo cu nunca.

“Ya caba por a tuma nota di documentonan cu a bin den lus publico, tanto den medionan social como di prensa, caminda entre otro a sali cu minister Chris Romero a nombra su casa den nada mas y nada menos cu tres  hunta di comisario SETAR, ARUBUS y FLPD caminda su mesun casa, tin cu controla e maneho di e minister aki.

Loke no mester lubida aki, ta e hecho cu e gobierno di coalicion, tabatin como prome punto den nan programa di gobernacion, ‘transparencia y bon gobernacion’ pero ya caba tur hende ta na haltura cu ni transparencia ni bon gobernacion no ta forma parti di e maneho di gabinete Wever Croes.

Mas straño ainda ta cu nos no por a ripara for di gobierno mes, ningun reaccion riba publicacionnan cu a sali relaciona cu e forma di proceder di minister Romero pero ora cu nos a tuma nota di e documentonan cu nos a haya den nos brievenbus, nos a compronde tur cos ya cu como comisario di SETAR N.V por ripara cu den un otro comisariado, a keda nombra nada mas y nada menos cu Nelson Orlando Oduber tata di ministe Dangui Oduber esaki nos por a wak cu nos mesun wowo nan ariba e extracto di Camara y Comercio.

Pues si tata di Minister Dangui Oduber tambe a wordo nombra den board di Setar, ta con e minister aki por bay hala atencion di minister Romero pa e hecho cu el a nombra su cas, si e mes a nombra su tata den un hunta di directiva, cu na su turno tin cu controla maneho di e compania y di e minister.

Pues ningun di e dos ministernan aki por hala atencion di e otro ya cu e pensamento di ‘friends & family & ex family’ ta prome cu pueblo, aki por sinti e cambio family & friends & ex Family a bolbe y ta mas bibo cu nunca y por ripara cu nada a cambia, caminda un minister ta pone su tata den board y otro minister ta pone su casa den tres board, pues e fiesta ta sigui e mesun maneho di e gobierno cu a dirigi e pais aki for di 2001 pa 2009 awe nos no por mira nada nobo.

Awor por compronde di con minister Dangui kier censura tur hende, apesar cu nos por a scucha cu su persona ta nenga di a censura hende, pero den otro carta cu nos a haya den nos postbus, ta mustra un carta cu el a manda pa tur su departamentonan, informando nan tur, cu per direct su persona a tuma e decision cu cualkier comunicado di prensa cu ta regarda informacion di un di e departamentonan cu ta cay bou di su responsabilidad, no tin mag di wordo manda pa ningun medio di comunicacion of social, tampoco pa ningun radio of television, si esakinan no tin autorisacion y su firma como minister di turismo, salubridad publico y deporte.

Tur departamento mester tuma contacto den e tipo di casonan aki, cu su relacionista publico, cu e mail adres y number di telefon y cu nan no tin mag di saca nada pa publicacion si su persona no wordo informa kico e departamentonan kier informa pueblo.

Pues esaki ta otro ehempel cla di censura pasobra nan no kier pa nada sali riba caya, pa pueblo no haya sa kico nan a haci of nan a fix.

Un desaroyo cu ta duna e impresion cu e ministernan aki ta pagando fabor na otro, caminda uno ta bisa minister encarga cu fundacion lotto pa deporte pa pone su casa den board, na su turno e minister di deporte ta pidi e otro pa pone su tata den board di Setar NV.

Esaki ta tumando luga den e gobierno aki, caminda nan ta traha cu e lema di ‘friends & family ^ ex family’ mientras cu ora cu ta toca turno pa pueblo, nan tin cu bay paga pa recoge sushi di cas y tin cu bay paga pa gobierno hay 130 miyon pa sigui gasta,” lider di fraccion Marlon Sneek ta mustra.