Diamars anochi partido AVP a tene su di dos reunion informativo pa duna pueblo mas claridad riba kico ta spera nos pueblo entrante prome di juli cu ta otro siman,  pa introducion di aumento di BBO y BAZV dor di gabinete Wever Croes, cu lo bay tin un efecto sumamente grandi riba entrada den tur cas rond Aruba.

Miembro di fraccion di AVP, Michael Lampe tambe a hiba palabra e anochi aki pa un grupo grandi di ciudadanonan cu a bin busca informacion riba e impacto cu e pakete di medida cu gobierno a tuma, lo bay tin pa nan.

“Diamars anochi a bolbe keda demostra cu gobierno di coalicion a tuma un medida drastico, introduciendo un pakete di medida contra tur promesa cu a wordo haci na pueblo durante di campaña pero nunca a duna pueblo e informacion riba consecuencia di e medidanan aki ta bay tin pa tur hende.

Por sinti prome, durante y despues di e anochi informativo aki, cu nos hendenan ainda no ta bon na altura di e consecuencia cu e aumento di BBO y BAZV ta bay tin riba finansa di tur hende, di tur famia ya cu e lo bay percura pa un inflacion hamas bisto sigur despues cu gobierno a impone e medidanan aki, sin tene dialogo cu pueblo of gruponan den nos comunidad.

For di momento cu gobierno dicidi  cu e tin mester di 130 miyon pa su maneho, esey ta mustra bon cla cu na luga di busca otro tipo di solucionnan cu no ta afecta interes financiero di nos pueblo, e gobierno aki no tey pa sirbi interes di nos pueblo manera cu nan a priminti durante di campaña electoral.

Loke ta haci esaki mas serio y cu nos por a sinti durante di e anochinan di informacion aki, ta cu Aruba tin un gobierno cu a priminti pueblo solucion sin medida, un vision cu a wordo promovi formalmente pa Prome Minister Wever Croes, kende tambe a priminti cue lo baha gastonan di gobierno dor di reduci e cantidad di minister di 9 pa 7 pa scapa 50 miyon di florin.

Ta dos promesa cu no a wordo cumpli cune ya cu e prome decision grandi cu gabinete Wever Croes a tuma, ta medida contra pueblo, sigui cu mesun cantidad di minister y den mesun rosea ta pidi pueblo pa carga pasenshi y pa dal algun stap atras prome cu bay dilanti.

Ta mesun Prome Minister a sigura pueblo durante di campaña cu su gobierno lo bay percura pa no solamente reduccion di prijs di gasolin y sigura cu lo importa gasolin mas barata, pero cu lo bay baha prijs di awa y coriente caminda hasta a papia di importa coriente te for di Colombia na un prijs mas barata.

Cosnan cu pueblo no a lubida, cosnan cu pueblo ta corda y pueblo a bolbe mustra nan mal contento diamars anochi ya cu entre otro  Minister Glenbert Croes a priminti cu gobierno di MEP lo bay aumenta salaria minimo ya cu ningun hende awendia lo por biba cu e salario minimo actual pero na luga cu nos pueblo, esunnan cu salario minimo mira cu lo aumenta salario minimo, gabinete Wever Croes a aumenta BBO y BAZV cu ta bay pone cu esunnan cu ta cobra salario minimo lo bay tin mas gasto, lo bay tin menos entrada tur fin di luna y nan problemanan financiero a bira mas grandi ainda.

Otro promesa falso, otro promesa iresponsabel di politiconan cu no tabata sincero cu pueblo, ni durante di campaña y tampoco awor cu nan ta den gobierno,” Parlamentario Michael Lampe a mustra.

El a sigui mustra cu AVP lo sigui cu e serie di reunionnan informativo aki den simannan cu ta bin pa asina pueblo haya sa di e consecuencianan di decision di un gobierno cu no tin e ser humano na pecho.