Fraccion di AVP atende e siman aki reunion di IPKO y tambe participa den e Tripartiet cu ta tumando luga na Den Haag, Hulanda.
E delegacion di AVP ta forma pa lider di fraccion Marlon Sneek, drs Richard Arends, Benny Sevinger y Arthur Dowers cual delegacion a atende diferente punto cu a wordo trata den e reunionnan aki.
“Pa loke ta e tripartiet ta e tres islanan den e parti Caribense di Reino cu ta bin hunto pa discuti y papia riba temanan comun caminda por pone puntonan di bista pa atende esakinan cu Hulanda pero entre nos mes tambe kico nos por haci.
Un di e puntonan cu a bin dilanti den e tripartiet ta e parti di por atende cu e ministerio di ‘samenswerkingraad’ pa garantisa pa pone basa riba ley, e posibilidad cu Ministernan di e parti Caribense di Reino por bin hunto pa traha hunto.
Nos por a mira esaki pas den pasado pero tog ta sinti e urgencia y tin e peticion for di locual ta e parti di Corsou muy en particular, pa yega na puntonan comun.
Puntonan cu tambe nos a atende ta e situacion cu Venezuela pa mira e efectonan cu a surgi ora cu a cera e frontera y mester bisa pa loke ta Corsou ya caba e situacion ta normal ya cu por mira cu barconan di fruta ta yega y trece fruta pa comunidad haya esaki na miho prijs.
Pa loke ta Aruba ainda esaki ta cera y no a logra di soluciona esaki pa garantisa cu por haya fruta y berdura y cualkier otro producto cu tabata wordo busca for di Venezuela, pa nan por yega aki y asina tur hende haya esaki.
Nos por a mira cu for di parti di Corsou tambe tabatin e peticion pa mira con nan por haya mas informacion riba e forma con Aruba a atende cu e aspecto di ‘dreamers’ cu ta hobennan cu pa un of otro motibo tin hopi tempo na Aruba pero no tin un status legal, y na Corsou y nan tin un problema similar y a acorda cu lo sigui papia riba esaki pa mira con ta bay atende cu esaki.
Otro punto cu a hala hopi atencion cerca nos den e mesun concepto aki ta e parti caminda nos ta mira cu pa un hende haya su paspoort Hulandes e persona tin cu haci su testnan tanto na Hulandes como Papiamento, nos a trece e punto aki dilanti pa tene cuenta si por uza e idiomanan di Reino caminda por duna e posibilidad cu por haci uzo di Ingles tambe pa por haci e toetsnan pa por haya e paspoort.
Motibo pa haci esaki ta e hecho cu nos ta mira cu si e reglanan aki no cambia, ta bay yega e momento cu nos ta bay tin mesun cantidad di hendenan c’un paspoort banda di e mesun cantidad di hendenan cu den e caso aki tin un firma liber.
Nos ta kere cu unabes c’un hende a scoge y a yega ta na haya su firma liber, nos ta papiando di hendenan cu tin riba dies permiso pa haya un firma liber, pero tin un grupo masha grandi cu despues di haya e firma liber aki lo keda riba nos isla pa 10 of 15 aña mas pues e idea ta pa wak con por atende cu e grupo aki nan por haya un status legal pa nan por participa activamente den tur decisionnan,” Parlamentario Marlon Sneek a informa di loke a wordo atende te cu awor na Den Haag durante di reunionnan.
