Recientemente fraccion di AVP a efectua un bishita na IVA, esta Inspectie Volksgezondheid Aruba, relaciona cu e accion di control cu e departamento aki a inicia riba casnan di cuido di nos ancianonan.
Un reunion sumamente fructifero caminda a intercambia informacion riba e trabou c IVA a bin ta hibando y con ta percura pa e centronan di cuido aki, ta cumpli cu ter rekisito stipula pa e ley cu a wordo introduci na 2017.
“IVA a bin ta haciendo inspeccion na diferente cas di anciano caminda e departamento a haci un sondeo bou di diferente di e centronan aki pa loke ta trata diferente aspecto y criterio caminda ta controla e higiena, cuanto hende tin den e centro pa e cantidad di trahadonan, si nan ta cumpliendo cu tur regla, si tin permiso y tur rekisito cu ta wordo exigi y con e trato y cuido cu ta wordo duna ta y si tur cos ta na ordo.
A trece dilani cu si e centronan cu no ta cumpli cu e reglanan stipula, nan por ricibi un multa te na 100 mil florin cual a spanta diferente directiva di e casnan aki ora cu a manda un carta cu nan mester cumpli cu rekisitonan y ora esaki no ta e caso nan por haya un multa hopi halto.
Manera cu nos a haya e splicacion ta importante ya cu esaki ta pasa den ley tambe cual ley di ‘ouderenzorg’ y e ley aki a wordo implementa na 2017 y a lanta tambe un plataforma di ‘ouderenzorg’ y un seccion tambe na departamento di salubridad pa loke ta trata ‘ouderenzorg’ a asina bay yuda stimula y crea maneho tambe riba e tereno aki.
Pesey mes tambe ta sumamente importante pa tin reglanan estricto, saliendo for di e ley tambe caminda e reglanan aki tambe por mira den e ley di ‘kwaliteit van den gezondheidszorg’ caminda eyden ta keda regla cu tin inspeccion y eyden ta stipula cu inspeccion ta encarga cu e control cu diferente casnan di cuido aki.
Gobierno a pasa diferente ley caminda entre otro e ley di ‘kwaliteit van de gezondheidszorg’ a wordo pasa na 2014, e ley di BIG cu tambe a pasa den e temporada ey y esun di ‘ouderenzorg’ y ta di lamenta cu net esunnan den partido MEP cu ta papia cu nan ta bon y cu nan tin atencion pa nos grandinan, a vota contra e ley aki y no a sostene esaki.
E ley awor ta wordo implementa y nos lo keda den contacto cu IVA pa scucha di nan con a sigui cu e proceso aki pasobra gobierno di AVP a duna hopi incentivo, a pasa hopi ley, mirando cu nos hendenan ta central, a duna hopi sosten manera nos muchanan, pasa ley di crèche, a pasa diferente otro ley pa salvaguardia interes di nos ciudadanonan, mescos cu e ley aki.
Pa e motibonan aki ta bon pa nos sigui vigila e proceso aki, e control ta necesario pero si ta asina cu mester stimula e ‘mantelzorg’, cu ta e ayudo rond cu ta sosode na cas pasobra tin un cantidad di hende grandi cu no kier bay den un centro y kier keda wordo trata na cas y pa tal motibo mester keda enfoca riba tur e diferente tipo di cuido aki pa asina salvaguardia cu nos grandinan ta ricibi e miho cuido cu nan merece,” Parlamentario Mervin Wyatt Ras a splica.
