Presupuesto 2018 entrega pa gobierno siman ta mustra un aumento di personal, y esaki ta apenas un di e mentiranan di MEP ora cu nan a campaña den pueblo, segun Parlamentario Arthur Dowers a declara diamars mainta.
E ex Minister di Husticia den gobierno di AVP sigui mustra riba e presupuesto 2018 y cu ora el a lesa esaki, el a yega na e conclusion cu esaki ta e script autentico di e rapport di “Feestvierend ten ondergaan” cu MEP a yega di entrega na politiconan Hulandes algun aña atras.
MEP a bisa den forma contundente cu den Gobierno nan ta baha cantidad di Minister y tambe cu na ta bay goberna sin tuma ningun medida contra pueblo, ya cu bahando e cantidad di minister y kitando tur hende cu AVP a tuma den servicio, ta yega na un “bezuiniging” grandi. “Nan no a haci ningun ehercicio pa baha ningun gasto. Loke nos a mira e Minister di Finanza haci ta baila na Aruba, baila na Corsou y baila na Hulanda.
Esey ta e parti di “feestvierend” y e pais ta bayendo “ten onder” bou di su responsabilidad, pasobra e ta “feestvierend” y e pueblo tin cu paga pa e mentiranan di partido MEP y e fiesta di Minister di Finanza.
Nos tur por corda ainda con e Parlamentario Wever Croes a bisa prome cu cada minister ta haya 3 trahado na su disposicion, despues el a bira 10, 15 y ultimo el a bisa den Parlamento cu lo bay tin un maximo, pero sin menciona kico e cifra maximo aki ta.
Hecho ta cu ningun di e ministernan tin 10 of menos di colaborado. Pesey nos ta bisa cu gobierno a aumenta personal, a aumenta gasto, a aumenta e presupuesto pa minister scorpion sin ningun splicacion.
Esaki ta duna nos e impresion cu ta trata aki di e “pay-off” of “zwijggeld” si por yame asina, pa cierto minister cu a tuma algun cos na momento di negociacion, chantahe, pasobra nan no tabata ministeriabel.
Esaki ta algo bergonsoso y e gobierno aki ta parce mafia, pasobra mi no por kere cu bo ta bin den un gobierno gañando pueblo, intimidando, menasando y spanta hende, y awo cu bo yega den gobierno ta presenta e cuenta na nan, cu no tin intencion di baha gasto. Loke bo ta haci ta bati henter pueblo cu medida.
Nos por conclui cu partido MEP ta esun cu ta hiba Aruba den bancarota cu e presupuesto 2018, caminda a aha algun gasto pero tin un aumento di e deficit 2017. Ta increibel con un grupo di hende por gaña di e forma aki y presenta un presupuesto bergonsoso. Esaki ta e script berdadero di e “Feestvierend ten ondergaan. Den e presupuesto aki por mira e confirmacion di nan mentiranan, ta sigui gasta placa. AVP a laga cos pa pueblo, e pais a prospera y bay dilanti, y Evelyn Wever mes a bay Corsou gaba e brug di Aruba na Corsou,” Parlamentario Arthur Dowers a declara.
