Ora cu bo sinta riba e stoel di Gobierno bo mester por compronde cu tin reto constante pa atende cun’e y crisis pa resolve tur dia; e gran diferencia ta con, como Gobierno, bo ta atende cu esakinan. E cumplimento di e normanan financiero durante e ultimo añanan no solamente a wordo confirma door di CAFT, pero tambe door di e cuentanan anual di Pais Aruba.
Durante gobernacion di Gabinete Mike Eman II, nos a logra cumpli cu e metanan ancra den ley pa cu e presupuestonan di añanan cu a carga e responsabilidad di gobernacion. Tur a conta cu aprobacion di Colegio di Supervision Financiero Temporario pa Aruba, esta CAFT. Ta trata aki di un reduccion di mas cu 160 miyon florin anualmente den e ultimo 4 añanan. No solamente nos a cumpli cu e normanan durante ehecucion di presupuesto, pero tambe na momento cu e cuenta a cumpli cu e gasto y entradanan. Esaki a wordo confirma na momento di e entrega e cuentanan anual, como tambe door di CAFT tambe den nan ultimo conseho cu ta textualmente cu “in tegenstelling tot voorgaande jaren is het Aruba voor 2017 niet gelukt om aan de LAft-tekortnorm van 0,5% bbp te voldoen”
Si despues di a hiba un campaña unda cu como partido bo a bisa di tin e solucion pa e retonan financiero di nos pais, y awe cu bo a logra drenta Gobierno bo no por presenta un maneho financiero, ta algo realmente preocupante. E actitud di e Gobierno actual di tira culpa riba e Gobierno anterior pa cubri falta di conocimento pa por desempeña un maneho financiero proactivo, ta simplemente inaceptabel, partiendo for di e punto di bista cu nan tin practicamente 4 luna den Gobierno caba y te ainda no por a presenta un plan di maneho general.
Tur dato riba finanzas publico a wordo compila door di e departamentonan gubernamental concerniente y comparti esakinan cu Parlamento di Aruba durante e ultimo 4 añanan. Y teniendo esaki na cuenta, ainda nos no por compronde pakiko e Gobierno di coalicion ta keda bisa di no tabata tin conocement di finansa publico. Durante campaña partido MEP a bisa y priminti di tin e solucion pa e retonan di nos finanzas publico sin tin mester di introduci medida, pero awe cu nan ta den Gobierno e storia a bira totalmente diferente. CAFT ta dunando nan un espacio sin precendente – esta di logra un norma cu ya caba a wordo logra na 2015 – y ainda no por cumpli cu n’e.
Como Gobernante bo a wordo elegi pa tuma decision y no pa pusha bo responsabilidad riba scochi di e Gobierno anterior. Si como Gobierno bo carencia di proactividad ta conduciendo deliberadamente na un situacion unda cu Gobernador por haya un instruccion riba tereno di finanzas publico, pa medio di un decreto real – un asina yama KB – ta ilustra un falta capacidad y cu promesanan di campaña no tabatin base.
