Parlamentario Mervin Wyatt-Ras durante conferencia di prensa di fraccion di AVP y na occasion di e dia mundial di Down Syndrome a haci uzo di e oportunidad di trece padilanti cu ta di importante pa sigui concientisa nos comunidad encuanto inclusion di esnan special den nos comunidad. Segun Wyatt-Ras por a tuma nota cu henter e siman tin actividadnan andando organisa dor di fundacion “Sea Bunita Sea bo Mes” y e fundacion “Amazing Realities” cu nan siman di concientisacion pa crea un “Amazing Reality for our special community”. Na Aruba nos conoce varios iniciativa di inclusion di nos ciudadanonan special den comunidad, entre otro ariba tereno di labor pero tambe di duna nan un mihor sosten y entrada, locual gobierno anterior a traha ariba dje tambe, sin embargo e proceso aki tin cu continua. Te ainda nos comunidad ta discrimina personanan special y si cada un di nos tuma nan nos encargo pa informa y/of orienta un otro persona encuanto personanan special y nan derecho nos lo yega mas leu. Wyatt-Ras ta elogia e actividadnan den e siman aki cu a ser organisa dor di e dos fundacion. Wyatt-Ras ta haya di importancia cu nos por para keto y refleha encuanto inclusion di esnan special den nos comunidad. Cada un di nos tin cu duna nos aporte pa asina haci nos comunidad uno mas uni y incluso, especialmente pa loke ta trata personanan cu tin un of otro limitacion o syndrome. Sea den ensenjansa, deporte, salubridad, social y cultural.