Parlamentario pa fraccion di AVP, sr Arthur Dowers ta mustra riba curashi di Minister Scorpion den gabinete Wever Croes, kende ta insisti di personifica Pontius  Pilatus,  tratando na laba man di e hecho cu el a forma parti di partido AVP pa mas cu 20 aña largo y cu ultimo ocho aña el a forma parti di gabinete Mike Eman pa 7 aña y un luna.

“Net Otmar kier papia cu gobierno di AVP tabata un gobierno di haci bunita, cu mester a duna mas atencion na e situacion financiero di e pais, mientras cu durante di e shete aña como miembro di gabinete Mike Eman I y II, su persona a forma tur presupuesto di e gobierno ey cu a wordo aproba pa Parlamento y esunnan cu a haya aprobacion di CAFT.

No ta por nada ta compara e minister aki c’un scorpion ya cu e mes no ta compronde cu e mes lo hinca su mes den lomba, ya cu si tin un minister cu a insisti pa haci bunita cu  proyectonan di otro minister, tabata Otmar Oduber.

Na cantidad di proyecto cu tabata regarda ministerio di Benny Sevinger, tabata Otmar cu a bay para haci bunita, dunando e impresion cu ta su persona ta tras di e proyectonan aki mientras cu e tabata bon na altura di e situacion cu tabatin.

Ta na su luga tambe minister Scorpion bisa pueblo cu e deficit crea pa su actual gobierno cu presupuesto 2017, tin su salario cu el a cobra como ‘overbruggingstoelage’  ora cu el a retira como minister pa bay hiba campaña electoral, pues lagando pueblo paga su salario pa e por haci propaganda politico partidista y personal.

No solamente minister Oduber kier a haci bunita cu hopi cos, el a forma parti y sostene practicamente tur proyecto grandi ehecuta pa Gabinete Mike Eman I y II pa awor e bin pretende cu esakinan tabata malo pa nos pais.

Ta un curashi di otro mundo pa minister Scorpion bin insinua cu fraccion di AVP ta contra proyectonan pa San Nicolas, sabiendo bon bon cu partido AVP a haci un esfuerso grandi pa logra haya interes di CITGO pa forma parti di e proyecto di reapertura di e refineria na San Nicolas.

Un proyecto cu su persona tabata contra di dje, ya cu e tabata kier a construi un hotel na Babybeach, mientras c’un miembro principal di su partido POR, Lopez Tromp, a vota contra di e refineria y recientemente a bolbe  declara cu e no kier e refineria di San Nicolas.

Tin un diferencia grandi ora cu bo kier papia di un proyecto di e magnitud di reapertura di e refineria, y ora bo kier papia di un proyecto manera un waf pa un ferry pa cual mas bien ta mustra riba un proyecto pa acomoda amigo y sponsornan.

Shete aña largo minister Scorpion a traha den gabinete Mike Eman I y II y awor cu el a traiciona e organisacion cu a forma su persona como politico, e ta pretende di elimina memoria di pueblo insistiendo cu e no tin nada di haci cu maneho hiba pa gobierno di AVP,” Parlamentario Arthur Dowers ta declara.