Segun programa di partido AVP, partido berde ta bay yega den tres fase na un Balanced Budget. Minister di Finanza, Comunicacion, Utilidad y Energia ing. Mike de Meza: “Nos maneho financiero pa un parti importante ta basa riba nos confiansa den e forsa di Aruba”. Den pasado Aruba a yega caba di wordo confronta cu crisisnan. Tur biaha Aruba a logra sali relativamente lihe di nan y a laga economia crece atrobe.
Minister de Meza a splica cu banda di mehoracion di eficiencia pa loke ta cobransa di belasting, e crecemento economico den e añanan nos dilanti lo contribui na mas entrada pa gobierno. “AVP ta kere den un crecemento economico sensato, den stimula empresa y den construccion di producto Aruba y esey ta loke nos a haci tambe. Pesey nos ta trata – pa evita mas tanto posibel aumento di belasting – pa mas bien enfoca riba realisacion berdadero di e crecemento cu nos kier mira”.
De Meza a splica e relacion entre e deficit presupuestario y aumento di belasting. “Ora cu Aruba na fin di 2009 a wordo confronta cu tres crisis na mes momento – ocho aña di deterioro, crisis economico mundial y ciere di refineria Valero – nos a scoge pa conscientemente percura pa economia draai atrobe.
Ora bo ta den un crisis profundo, bo tin un deficit di 400 miyon y bo kier stimula economia, bo no por logra un presupuesto ekilibra den un aña. Banda di esaki e gobierno anterior deliberadamente no a ataca e situacion penoso den e sistema di pensioen di ambtenaar. E prima total di pensioen na 2010 tabata 68% riba e salario: na 2013 esey lo a subi riba 100% si no a haci nada. “E deficit tabata core peliger di subi te 800 miyon y hasta mas, net na momento cu cu e pais tabata pasa den un crisis enorme. Na e momento ey bo no ta subi belasting manera e gobierno anterior a haci. Nos a scoge pa traha den control y den fase pa yega na un presupuesto ekilibra”.
“E prome fase pa converti e crisis den un crecemento economico y e prome reformanan structural di pensioen y di AOV a keda cla den e periodo 2009-2013. E di dos fase den e dos añanan nos dilanti ta pa finalisa e reformanan den e pensioen di ambtenaar, AOV y AZV y sigui cu mehoracion di eficiencia den e aparato gubernamental. Gobierno mester brinda miho calidad di servicio na miho prijs.
Fase tres (2016 – 2017) mester percura pa bin cu actividadnan economico nobo pa subi e nivel di entrada pa gobierno pa asina gobierno por cera presupuesto 2016 den forma duradero. De Meza a bisa di ta satisfecho di e maneho hiba aunke cu mester a surpasa hopi reto. “Nos tarea no tabata ni ta semper facil”. “
Apesar di e espacio financiero limita, loke tin ta wordo usa pa hiba un maneho positivo. Como Aruba tin un economia chikito y habri semper bo ta depende di factornan externo, manera por ehempel ciere di e refineria cu a pone cu mester a adapta e proceso di crecemento. Na 2013 nos por conta riba un crecemento nominal di 3.5% y un deficit di -4.7%. E hecho cu nos tin un liña cu ta bayendo ariba ta bin dor di cierto cosnan. Na di prome lugar nos tin un vision masha cla na unda nos kier hiba Aruba. Na di dos lugar nos tin un cuadro financiero strak na cua nos kier mantene nos mes y si nos sali pafo di e cuadro aki, nos ta haci adaptacionnan.
