Ora cu bisa cu gabinete Wever Croes tin mester di placa pa paga amigo y famianan cu a wordo tuma den servicio di gobierno, no ta nada mas cu e puro berdad, Parlamentario di fraccion di AVP, Benny Sevinger a declara.
“Cuanto mas Prome Minister Evelyn Wever Croes tin cu gaña pueblo cu e tin cu bin cu mas medida pa cera e buraco financiero, mientras cu realidad di e situacion ta sigui pa dos aña caba, cu tin aumento gasto di personal caminda varios Minister a rondona nan mes cu famia y amigonan cu contractnan lucrativo.
Si nos tuma Minister Glenbert Croes por ehempel, e tin tres ruman trahando pa gobierno, caminda aparentemente un ta haci su make up, otro ta saca potret y e otro ta scirbi carta di conseho pa e minister.
Sinembargo tur tin salarionan grandi, ganando miles y miles di florin y eey ta e abusonan cu pueblo a cuminsa mira caminda Evelyn ta bin dilanti y trata di convence pueblo pakico nan tin cu bolbe duna su gobierno mas placa.
Tin ora pueblo ta kere cu esaki ta politica barata cu ta wordo hunga y cu no a bin mas medida pero declaracionnan haci na e propio Prome Minister ta bisa con berdad esaki ta y pueblo tin cu tuma bon nota di esaki.
Entre otro Evelyn mes a declara cu su gobierno a bin cu e medida caminda companianan estatal di gobierno, pues ta companianan di pueblo, lo tin cu cumpra nan tereno erfpacht cu nan tin na e momentonan aki.
Ta bon pa mustra aki cu e terenonan aki ta di WEB Aruba MV caba, nan ta pagando grond belasting añanan largo caba, pagando 300 mil florin anualmente pero gobierno di Evelyn kier pa WEB cumpra e tereno aki for di gobierno pa asina e por haya 17 miyon florin.
Aki ta bon pa mustra cu mientras cu legalmente e tereno erfpacht aki ta di WEB Aruba NV, cu cumpra e tereno awo pa 17 miyon pa duna gobierno y riba dje e mester a duna practicamente henter su ganashi di ultimo tempo na dividendo cu ta miyones na gobierno caba.
Na luga di alga WEB keda cu e ganashi aki y pidi e compania di pueblo aki pa di e forma ey reduci prijs di awa y coriente, Evelyn Wever Croes ta exigi no solamente e placa di ganashi aki cu por a yuda pueblo pero ta bay pone WEB bay fia 17 miyon florin pa paga pa e tereno cu ya e tin den erfpacht caba.
Tur e cosnan aki pa motibo cu pa dos aña caba gobierno di Evelyn no ta buscando un forma pa reduci su gastonan, no ta buscando solucionnan diferente pa aumenta entrada di gobierno pero ta recuri na medida tras di medida contra pueblo.
Esakinan tur ta pa motibo cu ta sigui emplea famia y amigonan, sostenedo- y sponsornan mientras cu e unico cos cu Evelyn y su gobierno kier for di pueblo, ta pa pueblo tin su cartera prepara pa asina nan hinca man y saca miyones di florin atrobe.
Awor ta bon pa pueblo realisa cu aki poco tempo WEB Aruba NV ta haya su mes obliga na aumenta tarifa di awa y coriente, ya cu for di un caminda e tin cu saca e placa aki bek si e kier sigui cumpli cu su propio obligacionnan.
Pa aña WEB tabata paga 3.6 miyon florin na grondbelasting pero awor cu e ta wordo obliga pa cumpra su propio tereno, dentro di algun aña gobierno ta perde e entrada aki tambe y tur esaki pa motibo cu Evelyn tin mester di placa y ta pueblo lo tin cu bay paga den futuro e maneho sin pia di cabes aki, ora cu prijs di awa y coriente aumenta,” Parlamentario Benny Sevinger a declara.
