Laga nos stop di pretende cu e problema di salud por wordo soluciona cu un sugar tax. E mensaje cu nos ta scucha ta cu un sugar tax ta forsa a comunidad scohe pa opcionnan mas saludabe y ta juda reduci malesanan cronico.   
E ta un berdad cu tin un link directo entre consumo di sucu y malesanan cronico. Pero tambe ta un berdad cu e parti mas grandi di sociedad cu ta wordo afecta pa malesanan cronico ta esnan di menos recurso y esnan cu e entrada mas chikito den comunidad.  
Sugar tax a wordo introduci na differente pais desde 2014. For di Mexico te na Inglatera. Segun e instituto Technologico di Mexico (ITAM) despues di 4 anja cu a introduci e sugar tax na Mexico ariba refresco,  e resultado ta cu e no a logra su objectivo. Na prome instante e consumidor a reaciona ariba e subida di prijs y e consumo di refresco a baha durante un periodo cortico. Awe 4 anja despues e consumo a bolbe subi back y ta actualmente caminda e tawata prome cu a introduci e sugar tax na 2014. Ademas di esaki, durante e tempo cu e sugar tax a baha e consumo di refresco, toch e no tawata efectivo pa reduci obesidad of malesanan cronico . 
Segun e estudio di COLMEX no tin niun evidencia cu un sugar tax ta efectivo pa trece cambio den e consumo di sucu di e consumidor. Especialmente no tin cambio den e consumo di esnan cu entrada mas chikito cu ta e grupo di consumidor mas grandi. Sinembargo e posicion economico di e grupo aki si a wordo afecta di un manera devastador. 
Medidanan ariba consumo semper ta pisa y dal esnan mas pober den un comunidad mas duru. E famianan cu entrada minimo  ta entregando  mensualmente entre 25-30% di nan entrada  caba na caha di gobierno pagando pa tur belastingan actual. Un famia cu un entrada modera ta entrega entre 10-15% di nan entrada na caha di gobierno. Si haci un comparacion, e parti di e salario cu e famia cu entrada minimo ta entrega na caha di gobierno tur luna ta 50 % mas cu e parti cu e famia cu di entrada modera ta entrega na caha di gobierno tur luna.
E sugar tax cu Aruba ta pensa di introduci lo tin probablemente mes un effecto cu e tawata tin nan Mexico y na otro parti di mundo. E sugar tax lo ta un manra di schuif e responsabilidad di e malesanan cronico ariba e victima, castiga esaki un poco mas y haci e peso grandi caba cu  esnan mas vunerabel den comunidad  ta carga mas pisa ainda.  E conclusion no por ta otro cu un sugar tax lo ta solamente un set di medida pa trece mas placa den caha di gobierno. E no lo juda cu problemanan di malesa cronico y tampoco e lo ta ta beneficio di salud general. 
Sabiendo esaki, e lo ta inacceptabel pa accepta cu ta sigi cu e idea di un sugar tax.