Parlamentario mr. drs. Richard Arends ta na Hulanda den e dianan aki como delegado special di Parlamento di Aruba pa tratamento di e Ley di Reino den senado Hulandes, esta Eerste Kamer, encuanto e areglo pa resolucion di disputa entre Reino y e Paisnan di Reino. Na 2019 un delegacion di Parlamento di Aruba a participa den tratamento di e Ley di Reino aki den Tweede Kamer. Prome cu e proceso legislativo a continua den Eerste Kamer, Raad van State a informa Gobierno Hulandes pa reconsidera seriamente e areglo di resolucion di disputa aki. E siman aki e Ley di Reino lo wordo trata finalmente despues di mas cu 10 aña di preparacion. 

“Parlamento di Aruba ta keda riba e liña indicando cu e Ley di Reino encuanto areglo resolucion di disputa, manera aproba den Tweede Kamer, ainda no ta cumpli cu acuerdonan haci den IPKO y palabracionnan haci na nivel di gobierno. E amienda ‘Thijssen cs.’ ta institui un seccion nobo den Raad van State caminda, na momento cu tin un disputa riba interpretacion huridico di Statuut of  di otro reglanan Constitucional den Reino, e seccion aki lo duna su conseho.”

“No obstante cu Raad van State mes di obhecionan fuerte contra esaki, e desicion final riba e disputa ta keda den toch man di Conseho di Minister di Reino. Akinan ta caminda cu e Ley di Reino pa resolucion di disputa no ta cumpli cu palabracionan hasi: esta cu e conseho duna pa un instancia independiente riba interpretacionan huridico constitucional no ta final ni obligatorio.”

Durante su bishita na Hulanda Parlamentario Richard Arends tabata tin encuentronan cu senadornan di Eerste Kamer, como tambe cu Raad van State y otro coleganan parlamentario di Reino. “Tin tres opcion riba mesa awor: Eerste Kamer por acepta e areglo pa resolucion di disputa manera aproba y nos lo tin un areglo incompleto; of Eerste Kamer por dicidi di no acepta e ley aki manera cu el a wordo presenta y mande bay Tweede Kamer pa e wordo atende di nobo; of Gobernio di Hulanda respresenta pa secretario di estado Knops, por retira e ley por completo,” Sr. Arends a splika.

Parlamentario Sr. Richard Arends ta na Hulanda como delegado special, hunto cu Presidente di Parlamento mr. Ady Thijsen y Sr. Ricardo Croes, y lo hiba palabra durante tratamento di e Ley di Reino den senado Hulandes encuanto e areglo pa resolucion di disputa. E reunion lo tuma lugar den e Sala di Trono di Reino Hulandes, esta Ridderzaal, cu ta fungi como espacio temporario pa reunionan di Eerste Kamer.