E dicho “Un ons di prevencion bal mas cu un liber di sanacion ta  bin di e ex Presidente di Merca, Benjamin Franklin. E ta hiba na e pregunta si Bo a yega di pensa di prevencion den e cuadro ey? Ami semper a kere den prevencion. Semper mi a propaga prevencion tambe. Prevencion ta bal mucho mas cu deal cu e problema despues cu el a tuma luga caba. Un baca cu a hoga den pos, no por wordo resucita. Durante campaña mi a papia di prevencion continuamente. Aki mi ta referi naturalmente na prevencion di crimen. Pero prevencion ta aplicabel no solamente pa cu criminalidad pero tur caminda. 

Recientemente Ministerio Publico di Aruba a anuncia riba nan website e sumanan di multa cu hende por haya pa diferente infraccion. Esaki ta un bon ehempel di prevencion. Mi tin sigur cu hopi hende cu a wak esaki a pensa cu nan lo mester cambia nan conducta den trafico pa evita di haya e multanan aki. E suma ta halto. 

Ta bon pa pueblo sa cu e intencion di un multa nunca ta pa Polis of Ministerio Publico kita placa di pueblo den forma di multa. E intencion ta pa nos tur cu ta den trafico ta consciente cu nos mester mantene nos mes na leinan di trafico y ora nos faya pa cumpli cu esaki, nos lo mester paga multanan halto. Pues multa of boet mester tin un efecto preventivo esta pa nos no kibra lei pa nos no mester paga. Y ora bo mantene bo mes na ley, automaticamente lo no tin tanto accidente y peliger den trafico. 

Mi ta pone e informacion di e website di Ministerio Publico aki pa tur hende refleha riba dje.

Un otro ehempel di prevencion ta den e manera cu ta duna forma na e infrastructura di nos pais. Gobierno anterior a laga proyectonan atras pa construi casi 20 rotonde adicional na Aruba. Mi ta gradici e Gobierno nobo cu a sigui cu e proyectonan di rotonde di e Gobierno anterior. Den cuadro di ‘Gobernacion ta continuacion’ esaki ta algo di aplaudi. E motibo cu construccion di rotonde ta algo preventivo den cuadro di nos infrastructura ta pasobra rotonde ta pone cu e chauffeur mester baha su velocidad, duna preferencia prome cu subi e rotonde y despues drenta e bocht cu cautela cu ta pone cu e riesgo di accidente ta baha. Pues esaki tin un efecto preventivo riba accidente cu danki Dios ta yuda pone cu e cantidad di morto den trafico tambe a baha considerablemente. EMBED Excel.Chart.8 s  

E reduccion aki ta danki na esfuersonan di Cuerpo Policial, Ministerio Publico pero tambe di DOW y otro partners. Den tur area mester traha  riba prevencion na bienestar di nos pais. Mas siguridad den trafico ta nifica menos accidente. Esaki ta e Aruba mas safe y mas sigur cu nos tur ta desea. 

Un area cu tambe mi ta kere mester haya mas atencion ta e area di prevencion di adiccion. Adiccion na alcohol y droga ta un peso pisa pa nos pais. E ta costa hopi placa, pero tambe e ta destrui hopi famia. E ta costa hopi placa pasobra adiccion ta bay man den man cu ladronicia, violencia, kiebro di famia, malesa etc cu ta nifica hopi gasto na nos cadena hudicial, sectornan gubernamental manera den e mundo medico y social pa djis menciona algun. Mester keda enfoca riba yuda esunnan cu ta den adiccion caba pa guia nan con pa sali di e adiccion. Mester yuda y stimula esunnan cu ya ta trahando den e ramo aki pa ta mas eficiente y mas exitoso posibel. Mester yuda esunnan cu a wordo libera di nan adiccion pa nan haya trabou y integra den comunidad y bira un ciudadano productivo pa Aruba. Tambe mester sigui combati tur forma di importacion, benta y consumo di tur tipo di droga y tambe mester sigui lucha contra abuso di alcohol na Aruba. 

Algun siman pasa mi a papia tambe tocante e topico di cultivacion di marihuana aki na Aruba. Mi a splica cu esaki no mester wordo considera como un posibel pilar economico. Ban stimula plantacion di fruta y berdura pa consumo local y si ta posibel como un pilar economico y no marihuana. Hasta si e idea ta pa bini cu esaki medicinalmente, mester pensa pa importa e producto ey di luganan cu ya ta produci esaki. Cultiva cannabis aki na Aruba y despues bisa e pueblo pa no bay hum’e pasobra e ta malo pa bo no ta ‘make sense at all’.

 

Mester inverti mas den campaña di prevencion y conscientisacion pa nos hobennan pa nunca ni purba droga. Si nos wak cu un isla cerca di nos cu ta Jamaica ta den problema economico y su sector turistico ta den problema serio, siendo cu esaki ta un pais cu ta conoci pa cu su consumo di marihuana, mi ta kere cu nos mester pensa cu un ‘gewaarschuwd man telt voor twee’. Laga nos keda leu di legalisa marihuana. 

Mescos cu Aruba ta riba un bon caminda pa ta un isla cu ta lider den region den produccion di energia sostenibel, laga nos ta un isla modelo den nos region cu ta lider den otro cosnan positivo manera menos morto den trafico, menos hende adicto na droga y alcohol. Tur esaki ta cuminsa cu haci prevencion central den nos maneho.  

FIN