E ‘brainstorming session’ cu Partido AVP  a tene diaranson anochi cu varios sindicato, miembro di fraccion di AVP, sr Robert Candelaria a mustra cu el a keda hopi satisfecho cu e reunion aki.

“E session a bay hopi bon, nos ta contento cu nos por a sinta pa ‘scucha, pensa y recupera’ anto nos a cuminsa awe pa laga tur e sindicatonan pero tambe por ehempel un OPPA cu ta representando e pensionadonan cu a traha den gobierno pa nan duna nan opinion, nan dolor- y nan preocupacionnan pero tambe nan ideanan ya cu nos ta kere cu e proceso no ta corecto ora cu bo ta sali como partido y abo   ta bay bisa con cos tin cu bay pero como gobierno bo ta gobernando pa un pais.

Pues si ta bon, gobierno tin cu representa e pueblo pa asina goberna den un direccion, cu pa nan tambe ta sinti cu nan representantenan ta comprondi. Nan ta carga loke pueblo ta para p’e, anto e ora bo tin cu cuminsa puntra publo, envolvi nan, dialoga cu nan anto pa e ora bo sa kico ta biba den nan mente  y den nan bida y usa esey como guia pa traha bo maneho riba dje. 

Esey ta loke AVP ta haciendo y nos ta kere cu e ta hopi bon ora cu nos ta mira e input cu nos ta hayando di tur gremio, nan pensamentonan, nan sentimentonan, nan sugerencianan, envolvi esaki den otro anto e ora bay over na analisa esaki pa yega na conclusionnan cu ora nan mira AVP bek den gobierno, nan lo sinti y mira cu esaki tabata nos deseo, nos pensamento.

Pesey nos ta kere cu esaki ta sessionnan cu nos tin cu sigui cune pasobra nos ta mira e fruto di esaki y nos ta mira e necesidad ora cu nan ta sinti cu nos no kier djis sinta pa bisa nos kico ta  bay pasa y na final puntrami si mi ta voor of tegen pero cu realmente  bo ta parti di e proceso pa bo duna bo opinion, pensa y puntra y cuestiona otro di con esaki  y di con esaya.

Mi ta kere cu esey ta algo cu por mira cerca hopi gremio cu ta sinti falta di dje ultimo temponan  y AVP lo zorg pa esaki bin bek, pa e ta central den e forma cu nos ta bay traha.

A bin varios punto dilanti di sindicatonan por ehempel e rechtspositie di nan miembronan, e sentimento cu nan tin con e carrierelijn ta cana, pero tambe e topico di cannabis a bin dilanti riba kico ta e risiconan cu si bay cambia loke a wordo palabra cu e gobierno actual na inicio caminda intencion tabata pa legalisa e remedi, anto tussendoor ta wordo bisa cu a dicidi cu ta bay planta e cos aki tambe.

A bin padilanti den e seccion cu hopi ley cu a pasa caba no tin un bon manera pa controla esakinan anto si bay sigui pasa e ley aki, legalisa esaki, cu tur e risiconan cu por mira den otro paisnan cu a legalise sin un bon manera pa control y ehecucion, lo bay tin mas aspectonan malo pa comunidad cu lo tin bon.

Asina tabatin varios topico cu a wordo treci padlanti den e session aki pero na mes momento hopi valioso pa hinca nan den un cuadro caminda por usa nan como instrumento pa maneho despues,” Parlamentario Robert Candelaria a declara.