Durante su bishita di trabou na Hulanda, miembro di Parlamento pa Fraccion di AVP den Parlamento, Robert Candelaria, a topa cu e hoben Ursin Kelly cu ta trahando na e Handhavingsorganisatiedi Dienst Stadsbeheer di e gemeente Den Haag como “Senior Medewerker Vergunningen”. E hoben tabata masha interesa den e trabou cu e Parlamentario ta haciendo na Aruba riba e proyecto pa regla previlegio pa chauffeurnan cu limitacion fisico pa parkeer nan auto. E hoben kier a topa cu e Parlamentario pa por comparti algun idea y yuda pensa con miho atende cu e reto aki di parkeo pa tur chauffeur na Aruba cu tin un of otro limitacion, pa cual ta importante pa por parkeer mas cerca di nan destinacion.

Na Hulanda e asunto aki ta bon regla for di hopi aña caba y chauffeurnan a custuma cu esunnan cu limitacion tin preferencia riba e parkeerplaatsnan mas prominente. Esunnan cu por cana bon y ta mobilisa normal por cana un poco mas leu ora di parkeer., compara cu esunnan den rolstoel of cu no por cana cu facilidad. 

Ursin Kelly tin un amplio experencia cu e parkeervergunningsstelseldi Den Haag y tambe cu introduccion di “betaald parkeren” den e ciudad. Claro cu e ta dispuesto pa comparti e conocemento ey, specialmente di e miho practicanan, evita erornan cu nan a comete den e introduccion na Hulanda, pa asina e bay miho na Aruba. 

Manera ta conoci, Parlamentario Robert Candelaria ta haciendo hopi esfuerso pa chauffeurnan cu limitacion fisico na Aruba, dor di regla cu Minister Andin Bikker y cu Polis pa introduci leynan y maneho nobo. Tambe el a atende cu otro organisacionnan pa introduci cambio den infrastructura pa hendenan cu limitacion por mobilisa mas facil na edificionan publico di Gobierno. E esfuerso aki a cuminsa riba iniciativa di defunto Jos Solognier. E Parlamentario a priminti’e di lo haci tur esfuerso posibel y e ta contento di mira desaroyonan positivo den su esfuersonan, locual e ta sigur cu Solognier lo ta masha orguyoso awe.

Parlamentario Candelaria lo trece tur e informacionnan cu el a ricibi di Ursin Kelly pa comparti cu e instancianan local, den un esfuerso pa e introduccion di e maneho aki bay bon for di prome dia.