Gabinete Wever Croes I a cera refineria di San Nicolas, a permiti CITGO bandona Aruba sin cu el a paga 320 miyon florin pa despues presenta na grandi, dos compania nobo cu lo bay atende pa haya un operado pa e refineria aki.
Mike de Meza di fraccion di AVP den Parlamento, a mustra cu henter e desaroyo aki ta confirmando cu e gobierno demisionario di Evelyn Wever Croes, ta bezig ta sirbiendo interes di otronan y no interes di pueblo di Aruba ya cu gerencia di WEB Aruba NV, a bin ta haciendo estudionan pa un tempo caba, riba e forma con den futuro e compania di awa y electricidad lo por draai riba gas na luga di petroleo pa asina logra reduci prijs di awa y coriente.
“No ta awo ta papiando di convernti WEB den un sistema pa e funciona riba gas pero esaki ta un proceso cu mester wordo studia den e miho forma posibel y loke e dos directornan cu a wordo retira, a bin ta haciendo pa un tempo caba.
Awor ta presenta un compania Eagle LNG, cu supuestamente ta atende cu asuntonan di gas natural, cu a bin pa den e proceso di reapertura di refineria di San Nicolas lo a hunga un rol importante den e proceo di repartura, cu for di nada ta para dilanti portanan di WEB Arub NV y kier drenta paden.
Negociacionnan ta tumando luga, no dor di e ex directornan di e campania di awa y electricidad pero cu otro gruponan yega na gobierno, pa asina yega na un acuerdo cu WEB pa entrada di Eagle LNG den funcionamento di e compania estatal.
For di nada y pa colmo si scucha y lesa loke medionan di comunicacion a publica e siman cu a pasa, ta mustra cu e compania aki no tin capital pa traha cune pero su entrada di WEB lo habri caminda pa haya riba 1 biyon florin y ta mas cu claro cu mesora por mira cierto bufete di abogado, meti totalmente den e maniobranan aki.
Ta riba custia di pueblo ta hunga e tipo di weganan aki, anto Prome Minister kende ta responsabel pa atende cu WEB y otro companianan estatal, ta para bisa cu cara seco, cu su persona no sa mucho cos di loke ta pasando pero su swa si ta meti mey mey den henter e maniobranan cu a bin ta tumando luga.
Un prome minister cu ta bisa cu e no sa di con y pakico a kita e dos directornan pero sin ta bira bisa algun dia despues, cu ta cosnan cu nan a haci y cu ta pone Hulanda rabia a pone cu ta kita nan pero un storia cu ni su mes ta kere aden.
Tin interes ageno na esun di pueblo y pais Aruba ta wordo hunga den e proceso aki y un biaha ms por mira parlamentarionan cu tur ora ta papia di integridad, ta permiti nan mes wordo usa pa un gobierno cu nunca tabata sincero cu pueblo.
Awor cu e situacion a bira un tiki preta cu decisionnan tuma pa Richard Eman y Lati Wever pa cu WEB Aruba NV, awor miembronan di e fraccionnan den Parlamento di MEP y RAIZ, ta wordo yama pa participa den un intento pa bay purba hustifica loke a bin ta tumando luga.
Prome cu e gobierno aki a sinta, ya caba partido RAIZ a wordo transforma den un di dos fraccion di MEP den Parlamento y pueblo por bien lubida cu su derechonan ta wordo salvaguardia y defende pa e fraccion di RAIZ,” Parlamentario Mike de Meza a trece dilanti.
