Apesar di un periodo di hopi lucha cu su salud, fayecimento di Eric Agunbero, a causa shock y un ola grandi di tristesa den partido AVP. E partido pa cual su curazon tabata bati duro. E partido cu e tabata stima cu pasion y dedicacion.
E partido cu tabata parti grandi di su bida. Eric Agunbero, cariñosamente yama Pachi, a cuminsa cana banda di Henny ora cu Aruba tabata pasa den momentonan dificil. Na fin di añanan ’80 ora cu Aruba a caba di haya su Status Aparte, Erik tabata forma parti integral di e partido berde. Un persona sumamente leal na partido. Semper Pachi tabatey manera un clabo, den momentonan bon y den momentonan menos bon.
Si nos tabatin mester di un man pa yuda den cualkier evento, Pachi tabatey, firme manera un palo di kwihi cu reisnan cu ta core largo y hundo. Durante Concierto di Speransa, Celebracion 18 di Maart y otro eventonan cultural y special cu partido ta organisa, Pachi tabata e motor nan tras.
‘Puntra Pachi’, tabata un frase cu hopi den partido tabata usa semper ora cosnan tabata pega. Pachi tabata sa cu nos a apreci’e y stim’e cu tur loke nos tin den nos y e na su turno a stima nos cu henter su alma y curazon. Carnaval ta tras di lomba y partido a haya masha falta di Pachi pasobra e semper tabata traha riba e cahanan cu partido ta parti riba e rutanan di Carnaval. Dianan largo, ta corta, plak, corta plak, te ora delaster un caha a keda cla. Den su bario na Dakota y Tarabana, pero tambe den Aruba henter e tabata hopi stima, pasobra mescos cu e tabata stima su partido e tabata stima su pueblo y tabata semper cla pa yuda tur hende. Den campaña su cas semper tabata esun cu e prome bandera berde y esun di mas grandi. Den periodo di eleccion e tabata un activista y dirigente di bario cu hopi conocemento y creatividad pa trece e mensahe di su partido cerca tur hende. El a stima su famia den un forma ehemplar.
Algun aña pasa Pachi a bira malo y na e momentonan dificil ey di su bida, nos a sufri y sinti dolor hunto cu ne. Pa su enfermedad devastador Pachi mester a bay afo pa un periodo largo. Durante ultimo eleccion e tabata na Aruba pa un temporada cortico y apesar cu ya e no tabata por a papia, el a bula den Jeep cu lider di partido Mike Eman pa core Aruba rond cu ne pa brinda di e forma aki apoyo na Mike y su partido. Di prome momento cu Mike a drenta politica Erik nunca a kita di su banda. Manera un tata, un ruman grandi e tabata stima Mike y cuide cu alma y curpa. No unicamente den politica, pero tambe como amigo. Asina Erik a para hunto cu Mike y famia Eman na momentonan dificil di malesa y fayecimento di Blanche Eman. E tabata na nan banda di dia y anochi.
E curazon cu tabata bati duro pa partido AVP y su lider, a stop di bati y Pachi a pasa pa un otro mundo. Un mundo unda no tin tristesa, ni dolor tampoco sufrimento. Un dia nos lo topa otro. Esey ta nos consuelo. Na su señora, yiunan, su nietonan, amigo y conocirnan ta bay nos mas sincero palabranan di pesame. Eric su famia y su curpa lo yega Aruba diarason atardi. Partido y famia ta prepara un despedida di honor y amor, manera e merece.
Sosega na Paz, nos amigo, ruman, activista y dirigente, Eric Agumbero.
Mike Eman
Partido di Pueblo Arubano AVP
