Na momento cu SETAR a wordo privatisa y reorganisa, a ofrece paketenan na empleadonan cu lo no a forma parti di e compania nacional como empresa priva.  No mucho despues a surgi un disputa riba e base pa calcula e asina yama avloeiingsregeling.

A inicia un proceso legal masha largo y finalmente aña pasa huez a dicta na fabor di un grupo di e ex empleadonan aki.

Mientras cu den luna di augustus 2017 e prome grupo di 30 ex empleado di SETAR a wordo paga caba via nan abogado, dia 20 di oktober 2017, Sr Richard Arends den su calidad di minister di Comunicacion, a firma e landsbesluit pa hasi e pago di e di dos grupo di 60 ex-empleado posible.

For di e momento ey Directie Financien a cuminsa efectua e pagonan na e 60 personan despues di e verifica nan datonan.

Durante tratamento di presupuesto 2018, Parlamentario Richard Arends di fraccion di AVP a dirigi pregunta na su sucesor, Minister Romero encarga cu Comunicacion, si tur e ex-empleadonan di SETAR a ricibi nan pago.

“E mandatario a confirma cu entretanto tur ex-empleado di SETAR a ricibi nan pago,” asina Parlamentario pa fraccion di AVP, Sr. Richard Arends a bisa.

Excepcion riba esaki ta e pago na e herederonan di e cuatro ex-empleado cu desafortunadamente a bay laga nos caba.

Nos por recorda cu den e ultimo sentencia na aña 2015 huez a dicta specificamente na favor di mas o menos 30 empleado, pero e keda sin menciona e otro 60 nan den su veredicto cu tabata wordo representa door di sindicatonan.

Pa evita cu e grupo di 60 lo mester bay corte pa haya nan pago, ex-Prome Minister Eman y ex-Minister de Meza a yega na un acuerdo di principio cu SEPPA na december 2016.

“A ser acorda cu tur 90 ex-empleado di SETAR di e mesun manera”, Sr. Arends ta recorda. “Akinan a cuminsa cu un proceso di legislacion pa autorisa Gobierno pa efectua e pago pa henter e grupo di 90 empleado, incluso calculacion di e interes di mesun manera for di 2005. Tabata trata aki di un suma di mas o menos 4 miyon di florin,” Sr. Arends a sigui splica.

E pago efectua na e prome grupo di ex-empleadonan na inicio di luna di augustus 2017 a  encera e suma di 1.5 miyon florin via nan abogado.

Pa e di dos grupo tabata tin un suma di 2.5 miyon reserva cu lo wordo paga na momento cu e ex-empleadonan aki presenta na Directie Financien y firma e documentonan necesario.

“Cu hopi satisfaccion mi a ricibi confirmacion awe cu tur e ex-empleadonan a ricibi nan pago y asina pone un punto final tras di e odisea legal cu cada un di nan mester a pasa aden durante e ultimo 14 añanan.

Ex-Minister Richard Arends a keda masha satisfecho di por a cumpli cu ambos grupo pa nan haya e placa cu a keda acorda.