Ya tur hustificacion ridiculo cu Minister di Inhusticia, Andin Bikker por a uza pa trata di tapa su incapacidad, a caba y loke a resta ta un pueblo na merced di criminalidad, na merced di un gobierno cu no por brinda e preteccion y siguridad cu tanto el a priminti na pueblo durante di campaña electoral.
Ex Minister di Husticia y miembro di fraccion di AVP den Parlamento, Arthur Dowers a splica cu pa añanan largo, minister Bikker a lansa gritonan politico den su direccion, a sigura pueblo cu e tin solucion pa caba cu criminalidad den algun luna y awe mas cu nunca, pueblo ta sinti su mes prisonero den su propio cas.
E miedo cu tin pa Sali keiro, pa bay un luga pa disfruta di nan oranan liber, ta birando mas y mas y decision cu tur hende ta analisando prome cu nan dicidi di haci algo, pa tanto situacion peligroso cu tin den comunidad.
“Loke pueblo por mira ta un minister di inhusticia Bikker cu simplemente ya e no por splica of hustifica su maneho relaciona cu tur loke ta pasando y den sun afan pa trata di saca su curpa, e minister aki ta trata di punta dede riba Venezolanonan cu lo ta esunnan culpabel pa gran mayoria di atraconan cu bin ta tumando luga.
Pero aki minister di inhusticia Bikker ta lubida cu e grupo ey tambe cu el a yama Venezolanonan ilegal, ta SU responsabilidad, ta su persona ta encarga cu maneho di entrada of salida legal y ilegal na nos isla y cu e expresion aki, Bikker a practicamente confirma su incapacidad pa atende cu un asunto asina importante pa nos pais, cu ta siguridad di nos pueblo.
Mescos cu su gobierno, Bikker no tin plan di maneho pa presenta na pueblo, no tin nocion di kico e tin cu haci pa cumpli cu su promesa di reduci criminalidad manera cu el a priminti na pueblo pero ya ta conoci cu henter gabinete Evelyne Wever Croes, nunca a cumpli cu promesanan haci durante di campaña electoral.
E situacion di crimialidad ta asina serio cu e ta costando bida di hende, algo cu no por haci wega politico cune manera Bikker si a haci durante di su periodo den oposicion den parlamento y ora cu e kier pretende di alivia e presion den comunidad bisando cu ta ilegalnan ta comete atraconan, e ta confirma cu e no tin nocion di loke e tin cu haci.
Kende cu comete un crimen, kende cu viola nos leynan, ta responsabilidad di minister Bikker y loke ta mas tristo ora cu e kier a pronk cu cifranan cu criminalidad lo a baha, ata fatalidad a bati na porta di su propio gabinete, ora c’un persona yega na su colega minister, a wordo tira mata.
E situacion ta serio y mientras cu henter pueblo ta na altura di esaki, ta parce cu ta minister Bikker su ta esun cu no por compronde cu algo e tin cu haci, cu algo su gobierno tin cu haci, na luga di solamente acomoda amigo y famianan den gobierno, percura pa sponsornan y laga pueblo na merced di criminalidad.
Despues cu pa varios aña por a scucha Bikker pidi pa mi retiro, mira Bikker participa den varios marcha di protesta contra gobierno anterior y contra criminalidad, awor un aña a pasa y ni hik Bikker por a hik e palabra retiro ya cu awor realidad a bati na su porta y e no ta cumpliendo na interes di nos pueblo,” Parlamentario Arthur Dowers a declara.
