Miembro di e fraccion di AVP den parlamento Marlon Sneek ta denuncia cu apesar gobierno a papia cu no ta bay retira ningun hende na aeropuerto, e tin informacion cu empleadonan a cuminsa haya carta.
No ta awo, for di 7 luna pasa caba, el a bisa, a bin ta informando di “e abuso cu ta tumando luga na Triple A. Minister Dangui Oduber a core sali pa bisa cu no ta berdad, cu niun hende no ta bay cas, mientras cu payasonan di Parlamento tambe a organisa un actividad na Club Caiquetio bisando nan pa keda trankil pasobra ta bay manda carta pa minister y CEO di Triple A. Awe e realidad ta riba mesa.”
Dia 15 di december, trahadonan a haya carta recordando nan cu no tin trabou pa e aña cu ta bin, y cu lo bay Corte pa busca permiso pa manda hendenan cas. A pidi e empleadonan en cuestion pa entrega tur material di Triple pa dia 14 di januari.
Sneek ta cuestiona e maneho aki, pasobra Triple A ta haya subsidio di salario y ta un di e prome companianan cu a sinti movecion ora cu a cuminsa ricibi vuelo. “Un compania cu tin 258 miyon florin riba nan cuenta di banco. Un compania cu tur aña ta book ganashi di riba 25 miyon florin pa aña, awe ta manda trahadonan cas. Mas tristo ta cu puntra boluntarionan pa traha 4 ora, y e grupo ey tambe a haya carta.”
Loke e parlamentario tin entendi, trahadonan di uitzendbureau ta bay haci e trabounan necesario na aeropuerto. “Loke nos a bisa shete luna pasa, awe ta un realidad den Triple. Den un compania estatal trahadonan a wordo manda cas, y tin rumornan cu e mesun hefenan cu tin uitzendbureau cu lo haci trabou di esnan manda cas. Esaki ta e realidad di partido MEP y minister Danqui Oduber.”
A cuestiona con por ta posibel cu e trabou a keda existi, pasobra personal di uitzendbureau ta bay haci esaki, y a manda hendenan di aeropuerto cas. “Esaki despues cu a gaña nan den un reunion den Club Caiquetio. E carta ta papia palabra cla.”
Parlamentario Sneek ta denuncia cu minister Oduber a djodjo durante e tres añanan cu e ta minister hincando personanan den aeropuerto y esnan cu tin 30 aña den servicio mester sufri. Pero yiu di parlamentario si ta haya trabou fiho, pero otronan cu a duna gran parti di nan bida na e compania aki, mester bay cas. E ta un realidad cu basta trahado ta cera aña cu ne. Esaki ta e gobierno cu tin e ser humano central, un berguensa total.”
