E vision cu Prome Minister Mike Eman a drenta gobernación cune na 2009 despues di 8 anja di trabao duro a keda visibel den tur skina di Aruba. Un vision cu a encera hopi edificio monumental cu a keda rescata, renoba, restaura, remodela y tambe construccion di parke, plaza y otro centronan di encuentro y recreación y infraestructura transformador pa Aruba. Di promer día Mike Eman a traha di cerca cu Monumentenbureau y Monumentenfonds pa realisa protección, resctate y restauracion di hopi monumento cu a worde laga na ruina. E inicio symbolico tabata e rescate di Bestuurskantoor. Un cu tabata na punto di wordo bendi door di e gobierno prome cu Gabinete Mike Eman.
Como líder di oposición entre 2005 y 2009 Mike Eman a lidera e lucha pa no bende Bestuurskantoor y mantene y rescata e edificio histórico aki como nos Centro di Gobernación. Como Formador caba na 2009 e a duna contenido na su palabra y a habri e portanan di Bestuurskantoor bek reubica trabaonan administrativo den e edificio di Bestuurskantoor – e temponan ey un edificio abandona y den un estado deplorable. Imediatamente a inicia e proceso di rescate y restauración di Bestuurskantoor. Den esaki a logra apoyo di voluntarionan cu den un forma impresionante a juda cu trabao duro día y anochi pa haci e lugar den un tempo record funcionabel atrobe. Eman y su coleganan cu tabata parlamentario y a bira Minister a laga riba su petición nan derecho riba overbrugging cerca finazas di Aruba pa worde inverti den renovación di Bestuurskantoor. E suma total di 5 minister cu tabata parlamentario cu derecho di overbrugging cu a worde laga pa gobierno pa cuminsa restaura Bestuurskantoor tabata riba 750.000 florin. Tabata placa cu pa ley nan tabata tin derecho riba dje, pero a escohe pa laga esaki pa País Aruba pa por a inicia e trabaonan na Bestuurskantoor sin cu e gobierno a sinta ainda formalmente. Ki diferencia cu esnan cu awe 4 anja a neglisha nan responsabilidad cu prioridadnan robez y ainda ta papia di gobernación anterior. Hopi curashi!
Gabinete Mike Eman I y II a pone emfasis grandi riba restauración di monumentonan. E visión di rescate di nos Centro di Gobernación a haya un forma integral cu construcción di Cocolishi, Plaza Padu y restauración y trabaonan di mantención grandi di edificionan institucional rondona den e circulo ey: Edificio monumental Rekenkamer, Stadhuis, Censo, Edificio di Gabinete de Gobernador y edificio di Staten e edificio monumental Cosecha y Havenmeester Kantoor. Mike Eman su visión di renovación di Centro di ciudad y restauración di monumentonan a inspira sector priva tambe pa inverti den restauración di monumentonan priva.
Gobiernonan di signatura di su partido semper a duna prioridad na restaura y mantene nos patrimonionan nacional. Gracias na esey nos a logra restauración di edificionan monumental manera ta: Ecury y Henriquez Complex caminda nos impresionante Museo Arqueológico y Monumentenbureau ta situa, nos Stadhuis y Censo (cas di Arends y Hotel Colombia), nos Watertorennan na Playa y San Nicolas, nos Edificio di Corte, nos Centro di Gobernación Bestuurskantoor, Edificio di Rekenkamer (antes Julianaschool, después Biblioteca Nacional), Edificio Monumental Cosecha, Vuurtoren, cas di Gobernador, Nicolaas Store, scolnan monumental manera unda nos Universidadt ta estableci, La Salle College, Dominicus College, Rosa College, Rosario College, Sint Antonius College, Abraham de Veerschool, Sint Augustinus College, Santa Teresita College y mucho mas. Un cantidad impresionante di edificionan monumental a keda rescata y restaura bao liderazgo di Mike Eman. Awe su preocupación ta pa salba e edificionan monumental Juliana School y Beatrix School. Schoolnan cu a carga nomber di nos Reina Juliana y Reina Beatrix y a hunga un papel grandi den educación di Aruba. E lo ta lamentabel si laga e monumentonan aki sigui deteriora y bai perdi. Pesey awe e líder di fracción di AVP mr. Mike Eman a inicia hunto cu prominentenan den historia di ensenjanza na Aruba un lucha pa proteha, salba, rescata y restaura e monumentonan Julianaschool y Beatrixschool.
