Parlamentario Benny Sevinger a mustra impresiona pa e acogida grandi cu e reunion informativo di patido AVP dialuna ultimo na e centro di YMCA San Nicolas, caminda a duna pueblo informacion di e pakete di medida impone pa gabinete Wever Croes y con esaki lo bay influencia bida di tur ciudadano riba e isla aki.
Durante di e anochi di informacion aki, por a tuma nota cu ta biba un decepcion grandi pa persona di Prome Minister Evelyne Wever Croes, kende a bisa hopi cos durante di campaña pero a bira haci net lo contrario na loke el a predica prome cu eleccion.
“Por a tuma nota di e decepcion grandi cu ta reina den pueblo pa tur loke a bin ta pasando cu gobernacion di e pais, ya cu no solamente e decepcion ta grandi pa e hecho cu Evelyne, supuesto cabesante di e gobierno aki, pero tin ora tin e impresion cu ta un prome minister Otmar Oduber nos tin, ya cu tur hende por mira cu esun cu ta tuma liderazgo den e gobierno aki, ta Otmar Oduber y e tin MEP totalmente domina den su garanan y loke e ta bisa tin cu wordo haci.
Esey tambe nos por a sinti durante di e reunion informativo na San Nicolas pero principalmente e concepto general ta cu Evelyne ta un decepcion grandi, ya cu ta un señora cu durante di ocho aña a bin ta bisa cu “mi ta bisa loke mi ta haci y mi ta haci loke mi ta bisa,” cual ta un expresion di esun cu ta bisa esaki, tin cu cumpli cune tambe.
Pueblo ta mirando cu esaki no ta tumando luga, caminda pa cuminsa durante di ocho aña, for di tempo cu AVP a drenta den gobierno, Evelyne y su partido a bisa cu tin un mega debe despues nos tabatin dos luna den gobernacion.
Naturalmente AVP a bin haya un debe for di gobierno di MEP, gabinete Nelson Oduber, cu a laga un debe mescos cu tur otro gobierno anterior cune, pero for di prome momento Evelyne y MEP a cuminsa cu tin un mega debe y e forma cu MEP kier soluciona esaki, y cual nan tabatin ocho aña gritando den tur skina, ta cu nan lo soluciona esaki sin cu mester tuma medida.
Ocho aña largo e vision di MEP den oposicion tabata di atende cu e mega debe sin medida y den tur debate politico prome cu eleccion cu a tuma luga, por a scucha Evelyne Wever Croes bisa specificamente con e ta bay soluciona esaki.
Entre otro e lider di MEP a mustra cu prome cos cu e lo haci ta di baha e cantidad di minister di 9 te na 7 minister pero awe por mira cu e tin 8 minister ya cu ora cu señor Oduber a bisa cu su partido ta insisti pa haya 2 minister, Evelyne a cay pa e presion aki ya cu Oduber a bisa su persona bon cla cu si e no haya dos minister lo no tin gobierno.
Supuestamente nan lo a spaar 50 miyon dor di baha e cantidad di minister di 9 pa 7 pero awe tur hende por mira cu gabinate Wever Croes tin 8 minister y un staatsecretaris cu ta haci e grupo 9 y e gasto total di 8 ministernan aki, ta supera e gasto total di e 9 ministernan di e gobierno anterior.
Si tuma e gasto total di e bureaunan di e ministernan aki di loke nan tin, e gastonan ta supera esun di 9 minister pues niun caminda a reduci e gasto manera cu el a bisa cu e lo bay haci.
Di dos forma pa reduci gasto Evelyne a grita cu lo bay baha e coordinadornan pero awer tur hende por mira cu no ta coordinador tin pero ta friends & family a yega bek den gobierno y despues di a nombra e hobennan cu ta ruman y primo, a bay over na nombra tur esunnan cu tabatey caba cu ta ex ministernan di MEP.
Otro cos cu nan a bisa cu nan lo kita pa baha gasto di gobierno, ta e biahe pero ora cu nos tuma nota di presupuesto di 2018, cu den tur post di biahe, gastonan di oficina y otro gastonan adicional, a subi y nos por mira con ministernan ta bula di un banda di mundo pa otro caminda nan ta hasta topa na airport, ta saluda otro y informa otro unda nan ta bayendo y kisas un bes pa luna ta bolbe topa den conseho di minister.
Eseynan ta e realidad y decepcionnan di mas grandi cu nos por a sinti y mira den nos comunidad, caminda gobernantenan ta bisa un cos den campaña y ora cu nan ta den gobierno, ta bira haci otro cos,” Parlamentario Benny Sevinger a mustra.
