Oranjestad: segun sra. Arends-Reyes ta sumamente lamentabel cu atrobe gobierno ta midi cu dos midi. Tin gruponan di coordinadornan ta hañando contractnan di prolongacion pa 5 aña, mientras tin personanan trahando mas cu 25 aña den servicio y tin cu keda trankil cu un promesa di prolongacion di contract te cu fin di aña escolar, dus cu otro palabra prolongacion di algun luna. Den e caso aki ta papia di un grupo di instructor di natacion cu sra Arends-Reyes mes a manda hasi pregunta ya pa basta luna caba y a trece e topico na varios ocasion dilanti. E preguntanan a bai na Minister di Enseñansa tocante di e grupo aki y riba e decision di Minister pa bai over na duna les di natacion den kleuter klas. Cual na su turno tawata hopi cla den e contestacionan algun luna atras, cu por cierto no tawata na ventaha di e inscructornan. Desde e tempo ey pa awor basicamente e ‘bon noticia’ cu coalicion a duna e grupo ta e promesa pa prolonga e contract te cu fin di aña escolar. Awor ta keda masha hopi pregunta den aire manera ki dia e grupo di inscructornan aki lo haña preto riba blanco kiko ta e detayenan tras di e promesa di 7 di december aki? Bisa cu ta balora e trabou duro cu nan ta hasi ta un y actua riba e balor di berdad ta otro.

Si tin intencion pa na januari 2021 cuminsa cu gruponan di klas 3 cu no a haña natacion escolar ainda, con lo hasi cu e lugarnan di cambia paña pa e grupo di alumnonan, e infrastructura y protocolnan ta cla pa nan cuminsa cu e lesnan na grupo grandi di berdad? Y den caso cu e no continua pa un of otro motibo e inscructornan lo wordo paga? Y despues di e aña escolar, e curiculo oficial lo wordo adapta back pa duna natacion escolar den klas 3 of lo cuminsa duna natacion escolar den kleuter toch? Te ainda Minister encarga cu e grupo di instructornan di natacion escolar no a sali den prensa y bisa detayes di con lo sigui. Hasta personal encarga cu e cambionan di natacion e Minister di Enseñansa a busca dus planan mester por tin. E Minister di Enseñansa no a indica cu su planan a wordo para dus tin un discrepancia grandi den e percepcion cu ta creando pa motibo cu otro Minister ta hasi promesa na e grupo.

E Minister encarga cu Deporte a honra merecidamente e baluartenan den natacion escolar pero e Minister aki no ta a cargo di natacion escolar y e instructornan no ta resorta bou di dj’e, dus ta dos asunto separa. Atrobe ta haña cu ta priminti un grupo cu ta hende grandi, serio, cu tin obligacionan serio fin di luna pa cumpli cun’e y ta haña nan mes den mesun incertidumbre cu nan tawata ora cu a anuncia cu nan lo bai traha pa losse uren y cu nan lo mester bai duna les na muchanan hopi chikito, caminda cu nan a vocifera hopi cla cu Aruba no tin infrastructura pa duna e grupo di muchanan di kleuter les. E ta riesgoso, e muchanan no por cambia nan paña facil nan so, e horario di scol ta diferente y nan no lo yega na un diploma asina facil mescos cu alumnonan di klas 3 pa nan siña landa como meta y no pa custumbra cu awa manera cu e planan ta pa kleuter. Awor ta toca na e grupo di instructornan pa deduci di nan salaris slip di december wak si a prolonga nan contract y wak con nan lo wordo paga.

Tratonan asina ta sumamente condenabel, inhusto y lamentabel cu e gobierno ta laga e gruponan aki pasa aden. Atrobe mescos cu algun luna atras, Ministernan mester ta serio y duna claridad y no crea expectativa falso y temporario pa na final bisa cu no por a hasi nada pasobra no ta nan Ministerio. Mescos a pasa cu e scol Paso pa Futuro, a lucha, a priminti y wak awor toch no por cumpli y nan ta haña nan toch ta fuseer cu otro scol y sali di nan localidad. Tin un otro grupo cu tambe ta sumamente disgusta cu e trato of maltrato cu nan ta hañando di gobierno y ta e grupo di personal di limpiesa cu despues cu nunca nan no a haña un contract desde cu e gobierno aki a sinta awor kier duna nan prolongacion di contract pa 3 luna y cu 2 luna di anticipacion si kier kibra contract.

Kiermen basicamente si nan firma e contract of no si gobierno kier kita nan, nan por hasi’e toch. Ta ki sorto di gobernante nos tin na Aruba cu ta bisa cu tin hende central y ta permiti tipo di maltrato na nos ciudadanonan asina, ta permiti pa saca ciudadanonan di nan cas, bende nan cas cu nan aden, tira nan cosnan riba caya, keda sin awa siendo tin areglo di pago, muchanan cu mester biba sin meter di awa na nan cas, esaki contra di tur derecho humano, tur esaki den pleno crisis y ta treciendo comunidad den un stress enorme. Hopi mama cu ta cabes di cas ta den incertidumbre pa motibo di e practica nan aki, no ta husto cu tin un grupo si ta wordo privilegia cu 5 aña di contract y otronan cu tin añanan largo den servicio mester pasa un Pasco den incertidumbre cu un contract di algun luna. Esaki ta e danki cu nan ta hañando di gobierno pa sirbi pais tanto aña. Sra Arends-Reyes ta spera cu prome cu reces di Pasco ainda por tin mas claridad pa e trahadornan cu ta ricibiendo prolongacion di algun luna pa nan sa kiko e intencion cu nan ta.