Segun partido MEP, tanto esunnan den parlamento como esunnan den gobierno, pais Aruba ta den un crisis grandi y mester tuma medida contra pueblo, pa por sali di e crisis aki.

Tur cu papia, tur cu bisa algo riba e periodo nobo di gobernacion di gabinete Wever Croes, ta papia di debe grandi, di mega debe y otro excuusnan pa trata di tapa nan incapacidad pa goberna un pais asina prospero manera Aruba, miembro di partido AVP, Melvin Tromp ta declara.

“Nos por mira con e hendenan aki ta bisa cosnan cu nan mes no ta kere aden, ta papia di debe grandi cu a keda pero tur dia tanto pueblo y nan mes cu ta forma parti di pueblo, ta biba y gosa di e inversionnan cu a wordo haci den nos pais.

Pero mientras cu tin algun di e ministernan actual semper a grita di mega debe, a grita cu e pais ta na rand di bancarota, nan accionnan sinembargo ta completamente opuesto na loke nan mes ta grita y un biaha mas ta bolbe sali na cla con e gobierno aki kier manipula nos pueblo cu storianan sin sentido y mentiranan flagrante.

Un ehempel cla y raspa di esaki ta e hecho c’un minister cu den pasado su tata a nombre den un posicion na compania Setar hunto cu su ruman, awor e mesun minister yiu aki, ta bira nombra su tata den e hunta di directiva di Setar.

Sin duda algo di cuestiona ya cu aki ta trata di minister Dangui Oduber kende a logra pa haya su tata forma parti di e hunta di directiva di Setar, mientras cu por a brinda un oportunida na un hoben of otro persona cu sin duda lo por cumpli cu e obligacionnan aki.

E ehempel mas grandi di e situacion aki ta cu ex prome minister Nelson Oduber, ta cobrando caba un total di SEIS pensioen di biehes, tanto di Aruba como di ex Antias Hulandes, pues sin duda e no por ta den necesidad.

Sinembargo aki nepotismo ta na orden di dia ya cu den e famia Oduber aki, falta solamente un hende mas pa wordo poni riba payroll di gobierno ya cu tin e yiu minister, e yiu coordinador y e tata consehero awor na Setar, cu ta bolbe mustra cu MEP ta keda un gobierno cu ta traha pa sirbi interes di amigo y famianan y no di nos pueblo.

Pa pueblo no tin nombracion, pa pueblo no tin comision pa cobra of toelage pa ricibi, pero pa pueblo tin medidanan desorbitante pa asina cubri cu e tipo di salarionan aki pa un solo famia cu a saca asina hopi riba custia di nos pueblo caba,” Melvin Tromp di AVP ta declara.