Minister di Husticia Andin Bikker a mustra na varios ocasion cu su persona ta responsabel pa e cartera di ministerio di husticia pero bou di nignun circunstancia su persona kier carga responsabilidad concreto di e cargo aki.
Parlamentario Robert Candelaria di fraccion di AVP a mustra cu den pasado como parlamentario, ser Bikker constantemente tabata pidi pa retiro di e minister di Husticia di e tempo ey, ya cu e tabata kere cu e minister mester ta responsabel pa cosnan cu pasa den e mundo di criminalidad.
Candelaria ta kere cu awor despues di dos aña responsabel pa e cartera di Husticia, tin un situacion cu Minister Bikker claramente no por atende y soluciona pero ta busca fayonan tur caminda, cerca tur otro hende pero no cerca su propio persona.
“Por ehempel tin e situacion di KIA caminda na tur momento cu Minister Bikker kier papia riba e casonan di presonan cu ta huy, ta papia di un KIA den estasdo deplorabel y cu ta algto cu el a herede.
Awor Minister Bikkier a declara cu e kier un prison nobo y mi persona ta di opinion cu semper y cuando, ta bon pa yega na un prison nobo.
Sinembargo mi tin cu mustra cu ta remarcabel ta cu e kier financia e prison nobo aki den forma di un PPP, cu tanto e partidonan cu a formando gobierno, incluso esun di Bikker, a campaña contra dje.
Minister mester ta honesto y consistente si ya cu of bo ta pro of bo ta contra tur proyecto funcia bou die formula di PPP y bo no por ta pro ora ta cumbini so.
Di mi banda, mi por bisa cu den parlamento semper nos lo yuda na aproba ideanan y proposicion cu ta na bienestar di KIA y nos husticia en general.
Loke mi ta pensa ta cu awor, despues di 2 aña di gobernacion, a yega tempo pa Minister Andin Bikker stop di goberna mirando patras y semper keha riba loke el a hereda.
Tur minister lo drenta cu cosnan bon y cosnan menos bon cu ta wordo laga atras y e mester deal cu nan pero pesey pueblo a pone bo eynan, pa sigui traha cu loke ta bon y mehora loke mester wordo mehora.
No pa keda wak den spiel patras, purba laba man constantemente y culpa predecesor pa tur cos. Ora no culpa predecesor, ta culpa ambtenaar y esaki mester stop caminda e momento a yega pa cuminsa asumi responsabilidad.
Despues di 2 aña na mando, mi no ta kere esaki ta mucho pidi.
Mi ta kere cu tin cosnan cu semper por sigui traha riba nan, pa mehora nan mas ainda y no por sigui wak patras y keha di cosnan cu bo a hereda so. Si kier papia di herencia, papia di e bon tambe y na final, stop di papia di herencia y cuminsa traha riba loke esun cu ta bin despues di bo lo hereda, esta bo legacy.
Traha duro pa esun cu lo tuma e funcion dificil aki di bo un dia, no mester cana manera ta den un veld di mina e ta cana, pero traha pa laga un legacy positivo atras, dos aña a pasa caba.
Manera cos ta pinta, bo falta 2 aña mas pa un hende tuma over dibo y su reto mester ta, pa e laga e ministerio miho atras cu el a hañe.
Pueblo echt a cansa di tende cu tur loke bay robes, tur loke bo no tin grip riba dje, ta culpa di bo herencia y ora bo hereda algo cu si ta bon, ta lubida di duna credito na esunnan responsabel e tempo aya y ta sali corta sinta y claim cos manera ta bo mes a pense y ehecut’e,” sr Robert Candelaria, miembro di fraccion di AVP a declara.
