Parlamento den reunion publico a reuni tocante e e proyecto di PPP cu ta regarda Green Corridor diamars henter dia. Den un carta Minister Oduber a bisa presidente di Parlamento cu e mester yama un reunion publico urgente riba e asunto y e Stempel Voorzitter y su Stempelfractie den coalicion a laga e minister dicidi pa nan. Sin duda algun Parlamento tin cu controla gobierno pero Parlamento mester dicidi y e minister no mag sinta riba stul di Parlamento. Stranjo ta cu e minister tempo el a forma parti di gobernacion di AVP no a cuestiona e proyecto di Green Corridor.
Awor cu e ta den un otro partido diripente e ta cuestionando e proyecto y ta uza un rapport cu su mesun gobierno di e tempo aya a laga traha. Resultado di e rapport ta cu tin cu haci algun ahuste y tin drecha algun fayo. Esaki natural mester ta posible segun Wyatt-Ras. Pero e proyecto ta cai bai responsabilidad di e minister y e mester carga esaki.,Normalmente un minister ta pidi pa informa Parlamento y Parlamento ta dicidi con e ta ricibi e informacion y kico e ta haci. Pero minister ta indica cu e no kier duna splicasion den un “onderonsje”, asina e ta yama reunion di comision fiho of bijeenkomst y Coalicion ta bai ciegamente su tras. Hasta ta bai asina leu di traha un mocion pa wordo entrega dor di su fraccion. Aki e kier wordo apodera pa sigui trata cu Caribbean Infrastructure Company. Wyatt-Ras ta haya cu e mocion ta superfluo. Esaki paso ya caba e minister tin autoridad pa traha, pues e no mester ser apodera dor di un mocion.
E instancianan manera e.o. Dow tin profesionalnan cu ta haci nan trabou y ta obvio cu minister no tin confiansa den nan. Si ta asina e por actua y no tin cu skonde tras di Parlamento. Wyatt-Ras y su fraccion pues no por a sostene e mocion. Wyatt-Ras tabata contento si di constata cu diripente Mep cu semper tabata contra Green Corridor awor ta sostene un mocion pa apodera e minister. E parlamentario ta contento cu resultado di e proyecto di Green Corridor cu a haci cu nos por bai di pariba pa pabou y di pabou pa ariba riba nos careteranan cu a hisa nos calidad di bida.
