Parlamentario, drs Mervin Wyatt-Ras durante conferencia di prensa di fraccion di AVP a trece padilanti su preocupacion pa loke ta trata sector social. El a elabora encuanto di e personanan cu no tin entrada y no tin pan pa pone ariba mesa di nan famia. Segun Wyatt-Ras esaki ta un situation cu no ta acceptabel pa nos pais Aruba. Por bisa cu desde cu COVID a haci su entrada na nos pais un candidad di 37.000 persona a perde nan empleo.   Aunke cu poco poco nos hendenan ta hayando trabou, tog tin te ainda personanan cu ta sin trabou cu no cai ni bou di FASE of loonsubsidie, ni ta haya pakete di cuminda di Fundacion pa Nos Comunidad ni di Rode Kruis y no tin bijstand. Den hopi caso nan ta depende di nan famia of amigonan pa yuda nan. Tin un cantidad di persona pues cu no ta haya niun tipo di yudansa. Nan ta depende di otro miembro di famia of conocir pa por pone pan ariba mesa di nan famia. Esaki ta un situacion in acceptable pa Aruba. Muy enespecial en bista cu nos como parlamentario den e siman aki a aproba un ley den cual nos a entrega 25% di nos salario. Asina e suma aki por wordo dedica of poni na disposicion di nos pueblo. E ley aki a pasa unanimamente den Parlamento. Parlamento a pasa e ley caba un biaha y awor a trece cambia den dje. Den sentido cu a amplia e temporada cu e percentage ta applicable. E tabata te cu fin di e anja aki y a cambia esaki pa otro anja. Sinembargo e placa aki no ta yega serca esnan cu e mester yega serca dje. Ademas tin cu menciona cu Hulanda ta dunando Aruba placa cu yen di condicionnan, cu yen di medidanan. E placa e ora no ta yega serca nos hendenan den dificultad. Pesey Wyatt-Ras ta urgi e minister encarga cu Asuntonan Social un biaha mas den e temporada aki di Paz y Felicididad pa nos pueblo, durante cual nos famianan ta bin hunto pa asina celebra nacimento di ninjo Hesus, pa minister haci lo posible pa bin cu’n registracion Y ayudo pronto. Un forma pa haya sa ken ta e personanan aki cu no tin entrada, pa asina e personanan aki por haya un ayudo pa nan tambe por pone un cena navidenjo ariba nan mesa. Wyatt-Ras no ta kere cu esaki ta mucho pa pidi. Tambe tin personanan cu no por haya bijstand y nan no ta haya oido ora nan pidi esaki na e instancia concerni. Di otro banda e gobierno aki ta tumando tur sorto di medida. Enespecial esnan vulnerable den nos comunidad ta sufri di esaki. Medidanan cu ta afectando nos hendenan fuertemente ta p.e. den e sector di cuido medico. Aki a desminui e lista positivo di medicina. Menos medicina ta cai bou di e lista positivo.Ademas a introduci e eigenbijdrage di esnan cu ta bai como acompanjante cu pashentnan den exterior pa tratamento. Nan mester paga un propio contribucion. Tin di e personanan aki pa basta tempo no a haya placa for di AZV y ora nan yama no ta haya communicion ni ayudo. E personanan aki ta den otro pais, p.e. Hulanda, cu ta caro pa nan, y asina aki no por sobrebibi. Un otro medida ta cu nos hendenan no ta bin mas na remarca pa haya nan djente paga. Especialmente nos grandinan cu tabata ranca nan djente y laga pone placha, no ta haya esaki cubri mas. Tin tambe personanan cu no por yena djente mas. Den tur sentido nos pueblo ta wordo corta, especialmente esnan vulnerable den nos comunidad. Den diferente forma y hasta nos muchanan den ensenjansa ta victima di cortamento den budget.Segun Wyatt-Ras como Parlamentario cu ta dispuesto pa entrega 25 % di su salario e ta exigi cu e placa ta yega serca nos hendenan cu tin mas mester. Esnan den dificultad mester haya prioridad pa ser atendi dor di e minister manera mester ta. Ta urgi minister pa pone atencion ariba nos hendenan den necesidad pa nan haya un yudansa pa nan tambe por pone sikiera un cuminda navidenjo ariba nan mesa.