segun sra Arends-Reyes den e fin di siman cu a pasa ta un gran cantidad di mayornan y maestronan a vocifera nan malcontento atrobe con ta manehando Enseñansa tanto serca miembronan di fraccion di AVP como media social. Decision tras di decision a ser tuma den pleno pandemia di Covid-19 na Aruba, cu lo tin su consecuencianan negativo pa Enseñansa por ehempel di kita 14 miyon di subsidio di fundacionan cu ta wordo subsidia pa gobierno, ta trece inseguridad laboral pa trahadornan di limpiesa na scolnan y pa privatisa diferente scolnan bou di fundacionan. E scolnan aki nan metanan y vision ta cambia bou di un fundacion asina hopi cu e esencia di e scol y pa cual e la wordo funda ta stop di existi. E ‘ultimo baño di awa friew’ tawata ora cu Minister a anuncia cu lo continua cu Enseñansa riba distancia den henter e aña escolar nobo. No un of dos luna sino henter e aña escolar nobo. Ta di comprende cu na comienso ora scol habri back ta tene cuenta cu tur e reglamentonan di DVG y ta cuminsa cu mitar klas. Pero pa henter e aña escolar no ta realistico den practica. Y hasta si kier tene jiu na cas esaki ta un opcion, kiermen basicamente pa e maestro e lo kiermen cu e mester tey 5 dia fisicamente na scol, bai cursonan obligatorio y prepara pa les online tambe. Algun dia promer cu e anuncio un otro Minister a bin dilanti y recorda un y tur cu e virus no ta bai di mundo y tampoco di Aruba dus nos tin cu bai siña biba cun’e y cu tur e protocolnan di hygiëna cu ta wordo prescribi. Bisando esey tawata hopi cla cu lo mester bin un decision y e decision tawata cu e muchanan na cas no por keda na cas pa semper y poco poco lo mester adapta na e protocolnan na scol. Pero 40% atendencia na scol ainda kiermen cu 60% di ora di scol ta mayornan lo mester busca un guia. Tanto mayornan, maestronan y alumno tawata tin cu pone 100% pa nan jiunan por a sigui les online durante e pandemia pero pa motibo cu nan tawata tey pa supervisa. Y encuesta ta demostra cu hopi alumno mas cu 50% simplemente no tin e prerekistonan necesario y basico pa por a sigui les online. Awor cu a anuncia cu Aruba su economia interno ta bai habri, basicamente tur mayor ta bai nan trabou back. E pregunta riba e realidad cu parce cu Minister no kier comprende ta unda e muchanan lo keda e resto di dianan cu no tin scol. Por purba bende e idea di Enseñansa online con cu kier pero e realidad ta diferente. Aruba su famianan mester di cumpli full-time cu nan trabou pa pone pan riba mesa y ta di un banda inhusto pa impone un decision y despues laba man pa su consecuencia paso no ta gobierno nan jiu ni responsabilidad. Ta anuncia cu tin alumno di scolnan preparatorio ta bai scol 3 biaha pa siman, scolnan basico ta 2 dia y asina ta sigui te ora por ehempel EPI ta completamente riba distancia. Minister a indica ayera por escrito riba su fb cu e no sa con largo e virus lo tey y ta traha cu ley di calamidad. Conclusion ta e ora cu pa tanten tur hende lo mester busca solucion pa opvang, paga mas placa pa muchanan keda algun dia mas, busca laptop, paga mas data y internet, traha mas duro pa sobrevivi e crisis economico mientras e salario a bira menos of a perde trabou. Gobierno kier impone pero no ta duna alivio pa yuda carga e decisionan. Tanten cu no trek in e conseho di Enseñansa riba distancia pa 2020-2021 e ta keda vigente bou di e capa di emergencia y cada biaha lo wordo evalua of extendi. Salud ta sumamente importante pero mester keda realistico na locual ta conta pa Aruba. No por sigui exihi asina hopi di maestronan, sin duna nan respet, mester scucha nan preocupacionan pa futuro, riba dj’e bai contra di nan boluntad y keda forsa decisionan tuma unilateralmente. Ta lamenta cu miembronan di coalicion tanto den Ministerraad como Parlamento ta keda keto y continua di apoya e cambionan drastico aki incluyendo di privatisa scolnan publico contra boluntad di maestronan y mayornan. Ora cu maestronan y mayornan protesta mester scucha nan dolor y preocupacion, lo ta lamentabel cu tur politico di tur partido pero particularmente esnan den coalicion sa e consecuencianan, scucha y despues no hasi nada pa yuda nos maestronan y mayornan pa por traha mas trankil sra Arends-Reyes ta termina bisando.