Durante conferencia di prensa semanal di partido AVP, mr. drs Arthur Dowers a pone atencion un biaha mas riba e importancia di e situacion cu ta tumando luga. Hulanda kier tuma over cierto di e autoridadnan di e islanan den Reino pa medio di Rijkswetten cu sigur ta sumamente dramatico cu a haya y tin cu haya tur atencion.

Den e intento di tuma over, na e diferente paisnan,  tin cu menciona cu un di e temanan cu ta riba mesa ta enseñansa. Reaccion di comunidad, pero mas aun den enseñansa ta fada y disgusta cu e Minister actual, cu a pone nan expresa cu nan ta spera cu Hulanda yega mas pronto posibel.

Ta compronde e pensamento y sentimento di tur cu a expresa nan mes den e forma aki pasobra e trauma cu nan a biba e ultimo 3 añanan na man di e Minister Rudy Lampe como tambe Evelyn Wever Croes ta hopi grandi. Ta lamenta si cu ta expresa di e forma aki, cu ta prefera di entrega nos enseñansa na Hulanda pa nan maneh’e, cu nos haci’e nos mes. “Tin cu corda si cu, unabes entreg’e bo a perde tambe.”

Arthur Dowers ta enfatisa cu mientras ta elabora riba e tema di enseñansa na e momento ey den conferencia di prensa, no tin un claridad ni ken a bay over y ken no a bay over den e aña escolar aki. Un situacion cu no ta normal.

Lamentablemente a tuma un situacion di crisis cu no tabata predicibel pa ningun hende, ni por a tene cuenta cu ne di antemano pero sinembargo a mira hopi gañamento na momento cu coronavirus a presenta, cu hopi maltrato na e pueblo di parti cierto departamento y gobernantenan. A mira un abuso grandi pa loke ta trata enseñansa. Gran cantidad di mucha no a ricibi e formacion y atencion cu nan mester a haya den e aña escolar aki.

Den Parlamento a presenta e minister bin gaba riba un estudio cu menos di 50% di studiantenan a ricibi enseñansa adecuado, cu segun su persona ta un tremendo logro. Antes un 6 tabata voldoende awo pa e minister aki un cifra menos cu 5 a bira voldoende. Tristo.

No por culpa cu nan no a ricibi educacion pa motibo di virus, pero locual no ta bon ta cu un persona educa manera Lampe ta bin afo y tuma nos tur haci kens, ta aclama e porcetahe como uno triunfo mientras esaki no ta bon. Locual a spera cu e lo a haci un intento, of den e periode cu a sigui of den esun di vacacion cu nos ta actualmente, brinda oportunidad na esnan cu no a haya suficiente, ofrece un pakete di formacion caminda por lo menos nan por fortifica nan posicion na momento cu nan tin cu sigui.