Den conferencia di prensa di partido AVP parlamentario Richard Arends a trece dilanti ultimo desaroyonan riba e exigencianan di Hulanda pa brinda sosten financiero na e islanan. Recientemente Parlamento a reuni hopi largo riba peticion di Presidente di Parlamento pa Gobierno bin duna splicacion riba e ultimo avansenan pa locual ta trata e negosacionan cu Hulanda riba creacion di e entidad di reforma Caribense como tambe incorporacion di Aruba den e ley di Reino pa supervicion financiero como tambe e condicionnan proponi pa acorda den paketenan di reforma.
Partnernan strategico den Reino como base pa maneho economico
Maneho economico di Gabinete Mike Eman 1 y 2 tabata netamente basa riba cooperacion den Reino unda Aruba ta fungi como brug caminda tabata tin un situacion unda ambos pais, tanto Hulanda como Aruba, tabata sali beneficia economicamente. Nos ta kere den un Schiphol cu ta brinda su servicio y conocemento pa maneha bo aeropuerto na Aruba y for di Aruba ta ofrece servicio na otro aeropuertonan regional. Contrario na esaki, nos no ta kere cu un Schiphol mester bira doño di AAA. Esaki ta conta igualmente pa nos waf: nos ta kere den un Port of Amsterdam bin yuda desaroya como partner strategico, crea cuponan di trabou, exporta e conosementonan for di aki, pero nos no ta kere cu Port of Amsterdam mester cumpra Aruba Ports Authority. Un otro partner strategico emblematico pa e pilar economico nobo tabata TNO, cu a establece su mes akinan na Aruba y for di akinan exporta conocemento pa Argentina, Mexico, Colombia, Cuba, Boneiro hunto cu nos profesionalnan jong y yu di tera. E modelo aki no ta basa pa un TNO bin cumpra WEB of ELMAR.
E mensahe na Gobierno tabata uno cla.
Siman pasa Parlamento a aproba un mocion unanimemente rechasando pa Aruba aproba creacion di e entidad den forma di rijkswet cu lo tin podernan ehecutivo, como tambe creacion di e rijkswet financieel toezicht Aruba. A urgi Gobierno pa drenta den un dialogo y bin cu proposicionnan pa wak con por sali afo cu Hulanda di esaki. Den e momentonan aki tanto Gobierno como sector priva mester di sosten di likides, awo aki den momento cu nos economia a cuminsa re-start.
Richard Arends ta menciona cu nan como fraccion di AVP a bin cu alternativanan haciendo referencia na locual tabata acorda ya caba pa loke ta trata e ley di supervicion financiero di Aruba – e landsverordening local – unda cu a delega cierto autoridad na Conseho di Minister di Reino segun otro provicionnan di statuut, no nesecariamente locual ta usa awo akinan. Basa riba kico Gobierno di Aruba a acorda caba cu Hulanda, por wak con por yega na un otro forma di cooperacion genuino. No a haya un contesta concreto ainda di Gobierno pa locual ta trata e lista di reforma: kico ta aplicabel pa nos y kico no.
