“Nos tin dos a ta denuncia e bagamunderianan tumando luga na Serlimar alias “Ottymar”. Nos a mira cu for di dia e Minister aki  tuma Serlimar, e tabata un forma pa bay mira con ta cumpli cu sponsernan di campaña. Nos a denuncia esaki e tempo ey, ora cu a huur un edificio grandi cu no tabata wordo uza. E unico motibo cu a huur e edificio aki tabata pasobra e ta di un sponser,” Arthur Dowers, di fraccion di AVP a bisa den un declaracion.

El a splica cu otro prueba cu Oduber tabata kier a yuda sponsernan tabata cu el a trata di kibra e contracto pa huur un edificio nobo, ypa sigui uza edificio di sponser. Ora cu no a logra su meta, a dicidi di huur e edificio bieu toch como un centro di reciclahe cu te ainda no ta cumpliendo cu e obhetivo aki.

Esey tabata e prome paso tuma cu a hiba Serlimar den un situaciondi decadencia.

Loke tabata remarcabel ta cu tur e hendenan den e Hunta di Directiva a keda keto, el a cambia e director, y kier a bini cu un ley nobo di Serlimar. Den tur esaki un miembro di fraccion di MEP a haya su mes ta bandona su partido pasobra e no tabata di acuerdo cu loke kier a haci cu Serlimar. Tabatin un malgastamento formal di placa, poniendo potret di hende riba e trucknan di sushi, pagando pa esaki.

Awo despues di dos aña cu tur hende a bay di acuerdo cu “e bagamunderianan di Otmar Oduber, awo ta bisa cu mester di un CEO nobo. E tempo ey nos no tabata di acuerdo, pero awor nos ta mira pakico e mester a hacie. El a uza hende y despues scopnan pa tapa nan propio fracaso. No tin niun otro hende cu por wordo teni responsabel cu no ta Otmar Oduber mes. Mi ta spera cu tur e cheerleadernan den Parlamento, awo cu skorpioen no ta den Gobierno, pa sikiera cuestiona of mira loke el a haci y lagando un desaster den Serlimar. Tur loke a wordo haci den e compania aki tabata pa faborece esnan cerca di Otmar Oduber y cerca di su partido,” Dowers a bisa.

E politico ta bisa cu no por fabrica storia pa persigui contrincantenan politico. E ta haya straño cu Ministerio Publico no ta mira e manipulacionnan aki. E persecucion politico lo haya un rabo largo.

Tambe el a comenta e incinerator y deramento di sushi, cu a wordo otorga na personanan cerca di partido di Otmar Oduber. “Ki ta pasando na e pais aki. Tur hende ta keto y ta bula nek di hende, pagando hopi placa,” Parlamentario Dowers a denuncia.

Como cu ta trata di un compania Sui Generis, niun hende ta worry pasobra kico cu pasa Gobierno lo no cay aden. “Ta hopi cla cu ta e Minister a maneha Serlimar e ultimo dos añanan. Tur nombramento a tuma luga via di e Minister, tur cos cu a pasa eyden ta e Minister ta dicidi. Hasta e Minister a organisa manifestacion den un departamento Sui Generis di Gobierno, lanta trahado pa protesta contra miembronan di Parlamento di su contrincante politico (esun mas grandi di coalicion) y a guli wanta esaki, pasobra ta Skorpioen ta manda,” Dowers a bisa.