Enconeccion cu anja parlamentario nobo, parlamentario drs. Mervin Wyatt-Ras ta trece padilanti cu banda di e bunita ceremonia cu invitadonan nos mester para keto na e tarea di Parlamento y su rol pa garantisa democracia den nos pais.
Por conclui cu e coalicion di parlamentario e anja cu a pasa a baila segun tono di gobierno y a laga gobierno dicta agenda di parlamento. Den e rapport “overzicht van werkzaamheden” di Staten por tuma nota cu di e 701 preguntanan haci na ministernan algo mas cu mitar so (374) a ser contesta. Di nos fraccion di AVP mas cu mita di e preguntanan no a ser contesta. Wyatt-Ras su preguntanan mes casi 70 porciento no a ser contesta. E minister a a keda sin contesta mas pregunta ta Dangui Oduber, despues ta sigui Andin Bikker, Evelyn Wever-Croes, Rudy Lampe, Chris Romero, Glenbert Croes, Xiomara Ruiz Maduro y Otmar Oduber. Ademas di e reunionnan cu Wyatt-Ras su fraccion a pidi niun no a ser otorga, mientras cu tur reunion cu coalicion a pidi e presidente a ser yama. Aki tin un deficit democratico den desventaha di fraccion di AVP cu ta den oposicion. Den un democracia bo por a imagina cu no lo tin desventaha pa partidonan en especial un partido di 9 asiento. Es decir cu tur otro partido sea grandi of chikito tin mas preferencia y tin mas di bisa cu un partido grandi manera AVP. Ora tin reunion publico ta laga coordinadornan paga cu placa di pueblo bin grita y hasta bully parlamentarionan y publico, sin cu nan ta ser atendi debidamente. Por nota alavez cu no tin transparencia paso asuntonan di indole importante cu antes tabata ser discuti den seniorenconvent no ta ser discuti at all y pues no tabatin niun reunion di tal indole. Tampoco tin espacio pa discuti ora cierto leynan drenta parlamento. Mesora kier bulldoze nan den reunion publico. Presidente di parlamento mester bai pone mas prioridad pa p.e. Independisacion di Parlamento, optimalisacion di Staten y Landsuitgaven. Pa cu esakinan tabatin zero reunion. E ley di ombudsman cu a ser trata den gobernacion anterior y aproba y cu a keha cu no a yega na su implementacion, awendia ainda no ta na vigor y tur hende ta “muisstil” encuanto esaki. Pues tin hopi asunto pa mehora. Ta jammer paso ta un coalicion di hendenan relativamente joven pero nan pensamentonan ta dogmatico y anticua. Envez di weita e contribucion di cada un e parlamentarionan ta mira ta ken a bin reunion, mientras cu nan mes ta keda sin bin na tempo of no tey dor di cual fraccion di AVP cada vez tin cu duna quorum. Durante clausura di anja parlamentario a tuma despedida di un miembro di fraccion di Mep Sue Ann Ras cu ta sali for di ensenjanza y cu a retira ora ela haya critica ariba su comportacion durante un incidente na Hulanda en relacion cu Netflix. Wyatt-Ras kier bisa Sue Ann cu “ora un porta sera pa bo otronan lo habri” y ta desee exito.
