Medidanan y maneho di Gabinete Evelyne Wever Croes ta creando pobresa, dolor, sufrimento y pesimismo na Aruba. Esaki ta worde confirma den e ultimo “Consumer Confidence Survey” di Banco Central, asina Lider di AVP, mr. Mike Eman a inicia e presentacion di e raport hopi revelador aki di e situacion deprimi cu e comunidad Arubano a drenta e ultimo lunanan aki.

Eman ta bisa cu e locual nos ta mira, sinti y tende tur dia den pueblo ta worde confirma den e ultimo raport di Banco Central a base di e encuesta (survey) bou di consumidornan den e di tres kwartal di e anja aki. Descripcionnan den e relato di CBA riba e survey y sentimientonan di e consumidor ta sclama e dolor bou di nos pueblo: “e sentimento di consumidor a sigui deteriora”,  “situacion personal financiero actual tambe a bira mas pesimista”, “condicionnan di negoshi y economico actual a bay atras tambe”, “situacion laboral actual a cay”, “e indice di expectativanan ta esun cu a deteriora mas”, “expectativanan condicionnan di negoshi y economico a bira mas negativo”.

E dolor y pena cu pueblo ta pasando aden awor y su pesimismo pa cu futuro bou di e maneho di Gabinete Evelyne Wever Croes ta worde scientificamente prueba den e survey aki. E sentimientonan expresa no ta laga ningun lugar na duda cu un mayoria grandi di nos pueblo ta sufriendo enormemente bou di e gobernacion di Evelyne Wever Croes y cu nos economia ta worde severamente afecta dor di e medidanan y falta total di un maneho coherente cu perspectiva pa futuro, e lider di AVP, mr. Mike Eman ta expresa. 

E consumidor ta experenciando tanto nan relaidad di awe como nan espectativa pa futuro cu sentimientonan hopi doloroso, negative y pesimista. E ta hopi obvio for di nan contestanan den e survey di Banco Central cu den tur faceta di nan bida nos pueblo ta sinti su mes afecta: nan realidad financiero, prijsnan, situacion den mercado laboral, finanzas publico y tambe e sentimientonan pa cu futuro tur ta negativo.

Repasando e relato di Banco Central riba e survey aki e lider di AVP, mr. Mike Eman a expresa cu organisacionnan den nos comunidad, di tur sector, laboral, empresarial y esnan encarga cu supervision mester bati alarma pa hunto por cambia e rumbo desastroso aki cu Gabinete Wever Croes ta hibando Aruba.