Parlamentario Arthur Dowers di fraccion di AVP a keda asombra hunto cu gran mayoria di pueblo, pa e alegria grandi cu Prome Minister Evelyn Wever Coes y su gabinete, a presenta e bon noticia cu CAft a sorprende nan cu’ne diabierna atardi.
Despues di seis aña largo, porfin Prome Minister a dicidi di bin dilanti c’un bon noticia, no pa pueblo di Aruba pero pa su gobierno, cu Hulanda keto bay no ta confia y no ta kere den nan loke nan ta bisa of haci.
Minister di Financia Xiomara Maduro a presenta un concepto di presupuesto 2024 cu pa gran parti no ta klop pero e bon noticia cu el a ricibi di CAft, a saca su persona y su gobierno for di un preta hopi grandi.
Un surplus cu gabinete Wever Croes ta mira como triunfo pero en realidad di e situacion aki ta cu e surplus aki a ser logra cu placa ranca for di cartera di pueblo, caminda den un forma sin consenshi, a presiona pueblo pa sigui carga e peso grandi di un inflacion cu pa gran parti a ser ocasiona pa introduccion di cantidad di medida.
Pa colmo loke gobierno no a menciona den su conferencia di prensa dialuna anochi, tabata cu CAft a recomenda pa mas pronto cu por, introduci otro medida mas contra pueblo, esta e famoso BTW cu mester a drenta na vigor prome cu e 7% di BBO na frontera pero awor yegada di BTW ta dilanti porta di henter pueblo di Aruba.
Notabel di e conferencia di prensa di ayera nochi, ningun momento Prome Minister Evelyn Wever Croes a bin duna pueblo e bon noticia cu e surplus di 50.2 miyon cu tin, ta bay pa elimina e medidanan den cuido medico caminda tin miles di hende cu no por paga pa nan remedi of tratamento.
Miles di hende cu ta sigui paga un cuenta halto di coriente y awa ya cu ainda Minister Glenbert Croes no a reduci e prijs di awa y coriente manera cu el a priminti y tampoco a logra acuerdonan oficial cu el a firma durante di su gira mundial pa haya petroleo of gas barata pa Aruba.
Ningun di e ministernan di gabinete Wever Croes, a informa pueblo ayera nochi cu lo aumenta onderstand y bijstand, pa yuda esunnan den necesidad y tampoco a informa pensionadonan cu nan lo ricibi un aumento cu ta mucho mas cu e 3% cu anualmente nan ta ricibi di aumento cu den algun caso ta nifica un aumento di 27 te cu 60 florin.
E surplus cu Prome Minister Wever Croes y su gobierno a pronk cu esaki ayera nochi, ta placa di pueblo, placa cu rico y pober a paga na cantidad di medida cu a ser introduci uno tras di otro, pa yena caha di gobierno cu a permiti na crea e surplus aki di 50.2 miyon florin.
Un biaha mas pueblo por mira con gobierno di MEP y RAIZ ta gosa cu nan placa, placa cu pueblo a paga su sodo pero cu ta ricibi net nada bek for di e gobierno sin curason aki,” Parlamentario Arthur Dowers a declara ayera nochi.
