No tin claridad, no tin splicacion, solamente incomodidad,  desilusion y hopi decepcion den  comunidad cu ta sinti  pa 20 dia caba, e dolor di aumento di costo di bida, creando cantidad di problema financiero den hopi cas di famia rond Aruba.

Fuera di e problemanan financiero cu pueblo ta pasando aden, por scucha y sinti e decepcion grandi cu pueblo tin pa un gobierno cu a priminti solucion financiero di e pais sin medida, pero a bira duna pueblo un decepcion grandi cu su pakete di medida, Parlamentario Michael Lampe di fraccion di AVP ta trece dilanti.

“Totalmente normal cu den pueblo ta biba un ambiente di frustracion, di disgusto y decepcion, ya cu Aruba tin un gobierno cu a priminti tur hende pa trece solucionnan concreto sin cu mester tuma medida.

Sinembargo tur loke pueblo a ricibi te cu awor for di gabinete Wever Croes, ta un stapel di medida cu segun dianan ta pasa, lo bira mas serio ainda mirando cuanto cos mas tin na caminda cu lo afecta nan entrada di tur luna.

Gobierno MEPPORRED a bandona su promesanan haci na pueblo di trece solucion pa tur cos, percura pa un miho futuro pa nos pueblo pero tur promesa a wordo lubida y gobierno a percura unicamente pa privilegia famia y amigonan, campañado- y sponsornan, mientras cu pueblo ta wordo pusha rumbo un abismo financiero sumamente dificil.

Loke ta mas alarmante di tur esaki ta cu ainda no tin un luz na final di  e tunel scur aki pa pueblo, ya cu ainda gabinete Wever Croes tin 12 miyon pa reduci riba gasto di personal pero ainda no gobierno no a duna claridad con e ta haci esaki y kendenan tin cu bay cas.

Despues di ocho aña di gobernacion di AVP, ta reina incertidumbre den hopi cas di famia, ya u mientras cu  tabata percura pa duna un aporte financiero na famianan di  entrada abou pa cubri gastonan di yiunan cu mester inicia un aña escolar nobo,  e actual gobierno no a duna indicacion ainda con e lo bay yuda y si e lo yuda e grupo aki pa cubri  gastonan di scol.

Pa completa e desaster cu gobierno a ocasiona tin cu mustra cu e ciudadano a wordo converti den e victima di un pakete di medida cu gobierno mes ta mustra di no tin nocion di kico el a haci y con e ley aki realmente ta hinca den otro.

Sinemargo aki mi tin cu menciona cu esaki ta mas cu claro cu e lo a bira un bululu forma despues cu den un lapso di tres dia a dicidi di atende e ley aki den parlamento y aproba esaki tambe  sin sinta den dialogo cu gremio- y sector comercial pa analisa y studia e ley aki den e miho forma posibel.

Comerciantenan despues di a wordo confronta cu e cambio di ley pa aumento di BBO y BAZV, ta hayando splicacion na caminda con esaki tin cu wordo ahusta y cobra, demostrando e falta di seriedad y responsabilidad di gabinete Wever Croes den su ansha pa haya placa pa goberna.

Ya caba tin anuncia e medida caminda lo cobra pa recogemento di sushi dia prome di januari di 2019 mientras cu tin otro medidanan na caminda ya cu gobierno kier ranca mas placa for di cartera di nos pueblo.

Ta premira caba mas aumento di prijs di combestibel cu lo bay percura pa aumento di prijs di awa y coriente, aumento di prijs di gasolin y pa no lubida cu entrante dia 1 di januari 2019, miles di pensionado lo bay perde nan ‘reparatietoeslag’ manera minister di finansa a confirma.

Un situacion cu pueblo no a pidi p’e, ya cu gobierno di coalicion a priminti henter un otro scenario cu loke el a bin ta haciendo den su prome 9 luna na poder y esaki sin duda ta percura pa un decepcion grandi den comunidad,” Parlamentario Michael Lampe a declara.