Fraccion di AVP a tuma nota di publicacion caminda dos representante di fraccion di MEP a haci un bishita cerca e conocido experto dr. Mr. Rycond Santos do Nascimento relaciona cu supervision financiero y tambe Statuut relaciona cu autonomia economico y financiero.
Parlamentario di fraccion di AVP Arthur Dowers ta considera e accion aki algo hopi straño y hasta hipocrita ya cu ta for di 2015 tin discusion andando riba e asunto aki, caminda gobierno di AVP a hiba diferente discusion cu gobienro di Reino riba e punto aki, esta Aruba su autonomia financiero y economico.
“Aki un biaha mas ta bolbe resalta cu Aruba tin un gobierno cu ta perdi den tur sentido, cu no sa mes kico nan tin cu haci of con tin cu haci esaki pa sirbi interes general di nos pais.
Pa cuminsa ta bon pa menciona e dos parlamentarionan cu a busca conseho cerca sr Santos do Nascimento, tin di haber cu e menasa cu e lider di fraccion di MEP a manda direccion Hulanda algun siman atras, dunando nan di conoce cu fraccionnan cu ta sostene e actual coalicion, lo no aproba ningun cambio di ley di LAFT pa prolongacion di estadia di CAFT na Aruba, si gobierno di Reino cambia e normanan y bin cu exigencianan adiconial.
Sinembargo ta bon pa mustra aki cu for di momento cu e tres fraccionnan den parlamento a permiti nan gobierno manipula cu presupuesto supletorio 2017, creando un deficit exagera.
Ta bin acerca cu ta fraccion di MEP den pasado a practicamente a invita y hasta roga Hulanda pa bin interveni na Aruba, pensando solamente riba interes politico di partido MEP y lagando interes di e pais un banda.
Ta miembronan di e actual gobierno di MEP, a fungi como anfitrion pa representantean di CFT y hasta a organisa presentacionnan den e tempo ey pa awor bin actua mescos cu nan no sa di nada.
Si e fraccionnan di e actual gabinete den parlamento aña pasa no a permiti nan wordo manipula pa nan gobierno, awe e buscamento di conseho cerca un experto no tabata necesario.
Ta gobierno di MEP a bay Hulanda pidi pa cambia e normanan, pa pone normanan existente un banda pa haya espacion pa hiba un maneho financiero cu te ainda ningun hende sa con esaki ta hinca den otro y cu pa colmo e mesun fraccion di MEP no tin nocion di esaki.
Ta masha bunita cu fraccion di MEP ta buscando pasonan cu nan por tuma si Hulanda pone exigencianan adicional, manera reduccion di 12 miyon riba gasto di personal pero aki ta asuntonan cu nan gobierno a acepta.
En berdad lider di fraccion di MEP por insisti cu su fraccion lo no sostene ningun ley caminda tin exigencianan adicional pero na mes momento nan mester por ta na altura cu den e caso ey, gobierno di Reino por impone e KB cu MEP solicita e tempo aya pa gobierno di AVP, na momento cu Evelyne y Xiomara a bay Hulanda cu nan raport ‘feestvierend ten ondergaan,’ rogando Hulanda pa interveni na Aruba.” Parlamentario Arthur Dowers a señala.
