Parlamentario, drs. Mervin Wyatt-Ras a tuma nota cu den un medio di comunicacion a sali na cla pa medio di e PR di DVG (Directie Volksgezondheid) cu e Health App cu ta ser usa den cuadro di COVID-19 no ta ser maneha dor di DVG, sino na Kokolishi mes. En bista di esaki, Wyatt-Ras ta trece padilanti cu e Minister di Salubridad Publico no ta sincero ni cu Parlamento ni cu pueblo.
Segun Wyatt-Ras ariba preguntanan manda na e minister encarga cu Salubridad Publico ront di e asunto di e fraude di vacunanan na DVG y hortamento di placa di PCR-test na Airport, e mandatario a contesta cu esun encarga cu maneho di Health App ta DVG. Wyatt-Ras a puntra alabes si e maneho aki ta tuma lugar den/na Cocolishi. E minister a contesta: “NO”. Tambe na un manera fresco y grosero e mandatario a sugeri cu cu: “e insinuacion aki ta totalmente incorecto y infunda”. Awor e PR di DVG ta menciona cu e maneho aki tog ta tuma lugar na ministerio di e minister encarga cu Salubridad y Turismo. Segun e parlamentario Minister Dangui Oduber mester ta honesto y sincero cu Parlamento y cu pueblo y duna splicasion na pueblo. Wyatt-Ras a haci 33 pregunta dia 5 di januari y otro 33 pregunta dia 17 di januari na minister di Salubridad, a base di su contestanan fresco y grosero. Wyatt-Ras no a haya contesta ainda riba e preguntanan di dia 17 di januari. Tambe Wyatt-Ras a cuestiona cu no tabatin destaho pa loke ta trata e asunto di traha e App. Ta preguntannan cu a ser haci na persona di e minister. E minister a contesta cu dor di COVID, el a duna SETAR e trabou aki, mientras e ta haci comosifuera Wyatt-Ras ta critica SETAR. Wyatt-Ras a expresa: No shon ta minister ta responsabel pa su maneho y decisionnan. Ta e ta encarga cu Salubridad Publico. Wyatt-Ras ta trece padilanti cu su colega di fraccion di AVP, sra. Gerlien Croes, tambe a haci pregunta encuanto e mesun asunto na e minister encarga cu economia y Sra. Marisol Lopez-Tromp a haci e preguntanan na Dangui Oduber. E minister mester contesta. Esey nos ta keda den espera di dje. No por skonde tras di investigacion. Aunke tin investigacion andando, e preguntanan cu Wyatt-Ras a haci ta preguntanan simpel cu e minister por contesta.
Segun Wyatt-Ras, minister mester para pa su actonan y no skonde of huy of bira spoorloos pa e no contesta esakinan. Wyatt-Ras ta referi na e mesun momento na e ministro presidente, Evelyn Wever-Croes. Un minister presidente cu awe ta ausente ora cu a trata e asunto di Bubali Plas den parlamento, cual ta un asunto preocupante pa interes general di Aruba. Un asunto caminda cu tin desperdicio ta bai den awa di lama, unda nos turistanan ta banja y unda nos hendenan, nos muchanan ta banja y tin peliger pa nan salud, e ministro presidente aki no ta den e reunion. E ta no a bin pasobra el a bai un otro compromiso. E no a notifica Parlamento. Ta ora un miembro di Parlamento a puntra esaki, e presidente di Parlamento cu semper ta sali na defensa di su partido a reacciona na un manera bruto y arogante.
Wyatt-Ras ta bisa: shonnan nos a pidi un reunion publico riba e asunto di Bubali Plas y a haya un bijeenkomst. Wyatt-Ras ta warda su preguntanan pa reunion publico cu a ser pidi. E presidente di parlamento na su antojo ta cambia reunionnan pa acomoda ministernan. Segun Parlamentario Wyatt-Ras Minister Evelyn Wever Croes mester bin duna cara na pueblo, duna splicasion encuanto Bubali Plas y kico e ta bai haci cu’ne. Colega Ryçond Santos do Nascimento a cuestiona e asunto aki den extenso. Wyatt-Ras no ta bai ripiti, su colega a haci hopi pregunta al respecto. Wyatt-Ras ta kere cu gobierno di Aruba mester duna cara. No manda e minister encarga cu Naturalesa. Ta awor e minister aki a cuminsa atende cu e cartera aki. E no por contesta e preguntanan cu e minister cu tabata encarga pa diferente anja den gobernacion si mester contesta. Minister Presidente mester para responsabel. Pa 2021 nada no a wordo haci. E mester bin duna contesta. Dangui Oduber a haya of pega cu mesun manera cu e minister presidente. Ora cos ta hot, ta core bai, ganja cu tin cu bai tal caminda , ganja pueblo. Mester bin Parlamento pa duna splicasion na pueblo.
Riba pregunta di miembro di prensa e parlamentario a contesta cu e hecho cu Dangui Oduber no ta contesta preguntanan tin di haber cu e tin algo di skonde. Parlamento tin su trabou pa controla y cuestiona maneho di gobierno. Di e preguntanan cu Parlamento manda pa ministers a resulta na 2021 cu mas o menos 73% so ta wordo contesta. Esaki ta un falta di respet pa Parlamento. Ademas awor ta sali na cla cu e minister encarga cu Salubridad tin algo di skonde pa no contesta Parlamento. Ta falta transparencia di parti di gobierno pa cu Parlamento. Gobierno aki desde comienso no a duna parlamento informacion necesario pa Parlamento por hacu su trabou. Un ehempel di esaki ta e deal di e LNG. Den e caso aki Parlamento no a mira e contract. Gobierno a gaja Parlamento cu nan tampoco no a mira e contract. Un otro ehempel ta reaccion di Raad van Advies riba e ley di LIM. Aki Raad van Advies a cuestiona gobierno cu no a duna splicasion encuanto diferente cambio di areanan cu ta resorta bao di cierto carteranan ministerial. Di gobierno ta ser spera cu e mester una nos informacion. Wyatt-Ras ta nota cu e ministers ta tuma e ehempel di e minister presidente cu no ta contesta y nan ta bai haci mescos. Pueblo ta spera di gobierno cu gobierno ta responde. Pasobra ta trata placa di pueblo cu mester ser responsabilisa. Wyatt-Ras ta keda den espera di e contestanan y tambe lo manda un rappel pa minister pa asina e por contesta e preguntanan haci na su persona debidamente.
