Tin un dicho na Papiamento cu ta bisa: “tin ora papel muha mes por corta hende” y pa sr Melvin Tromp di partido AVP, esaki ta aplicabel den caso di lider di fraccion di MEP den Parlamento, Rocco Tjon.
“Nos tin algun dia caba cu e marionetanan di fraccion di MEP, wordo ordena pa habri un campaña contra di Mike Eman lider di partido AVP, despues cu a wordo anuncia un manifestacion contra medidanan di gobierno pa dia 12 di april proximo.
Pa mi sorpresa mi por a scucha lider di fraccion di MEP, Rocco Tjong reacciona riba declaracionnan di Mike Eman, cuestionando e maneho di gobierno di AVP y hasta tribi di papia di ‘prioridadnan robes.’
Of all people net Rocco Tjong mester midi su expresionnan ya cu si e kier papia di prioridadnan, e tin cu contesta loke mi persona na dos ocasion a ret’e pa haci si su persona y su partido ta insisti pa papia tambe riba integridad, esta di publica e decision di Corte contra su persona.
Te na ora cu Rocco Tjong no haci esaki, su persona tambe tin prioridadnan robes y kier cuestiona cosnan cu e no por cuestiona, manera entre otro vocifera cu gobierno di AVP tabatin prioridanan robes.
Den esaki lo mi kier ta masha cla cu Rocco Tjong esta cu si tin un prioridad robes cu AVP a tuma, tabata na momento cu nos minister di husticia a nombra su persona como Director di KIA, un posicion cu el a asumi cu man habri, anto pa colmo for di un gobierno cu Tjong tabata considera di tin prioridadnan robes.
Si e tempo ey Tjong a para duro y nenga e nombracion aki anto awe e por papia di prioridadnan robes pero no yama minister di gobierno di AVP danki pa e posibilidad aki brinda, anto awe ta haci como sifuera nunca e lo tabatin algo di haber cu e gobierno cu e ta yama di prioridadnan robes.
Un aña Rocco Tjong tabata director di KIA y awe e mesun minister di husticia cu e ta sostene como miembro di fraccionnan di gabinete Wever Croes, esta Andin Bikker, constantemente ta cuestiona e maneho cu a wordo hiba cu KIA, incluso loke Rocco Tjong a haci eyden.
Manera cu el a bira miembro di parlamento pa fraccion di MEP, Rocco Tjong a laba man di KIA y a entrega e puesto di director cu a habri caminda pa gobierno nombra un director nobo y den esaki nos por conclui cu na final di e gobierno di coalicion actual, Rocco Tjong lo bay wordo nombra den un otro calidad sin duda.
Ta bisto cu practicamente henter fraccion di MEP den ultimo dianan a wordo ordena pa gobierno pa trata di intimida e accion di dia 12 di april proximo, caminda partido AVP riba insistencia y peticion di hopi hende den pueblo, ta organisa un marcha pa salba Aruba di mas medida, ya cu mas medida ta na caminda.
Gobierno actual mester di mas placa, nan mester prepara nan mes pa nan futuro y ta pueblo ta esun cu tin cu paga pa esaki sigur ora cu nos mira con gobierno ta practicamente sigui emplea mas hende den servicio di gobierno.
