E falta di curashi, e falta di caracter di lider di fraccion di MEP, ta keda impresionante y loke ta mas impactante di esaki ta e hecho cu Rocco Tjon mes ta insisti pa mustra pueblo su falta di seriedad ora cu e tin cu defende interes di pueblo manera cu el a hura di haci.
Parlamentario Arthur Dowers ta señala cu na luga cu sr Tjon sali dilanti den prensa y condena e hecho cu su lider di partido y prome minister Evelyne Wever Croes a pasa converti su fraccion den un grupo di payaso di circo, su prome reaccion ta di busca excusa pa defende un gobierno cu no ta respeta e parlamento cu tin cu controla su maneho.
“Ora cu pueblo a spera cu Rocco Tjon sali bin dilanti y cuestiona e forma con tanto prome minister como minister di finansa a gewoon schuif parlamento un banda cu e protocol cu a wordo firma cu Hulanda pa loke ta supervision financiero, Tjon a dicidi di hunga pa kens y trata di mira den direccion di AVP.
Prome minister a degrada e tres fraccionnan den parlamento cu ta sostene su gobierno, bisando prensa cu e lo bay informa parlamento riba en acuerdo aki, pues ya parlamento no tin nada mas pa bisa, cuestiona of cambia riba e acuerdo aki.
Ta mesun cos a sosode algun siman pasa ora cu prome minister a bay den prensa y confirma cu pa dia 15 di december proximo, presupuesto 2019 lo ta aproba pa parlamento, sin cu ainda e presupuesto a yega parlamento, confirmando un biaha mas cu ta gobierno ta dicidi kico ta pasa cu e tres fraccionnan den parlamento.
Manear un set di mucha manda, un set di hende cu no por bisa gobierno nada apesar cu ta parlamento tin cu controla gobierno pero sr Tjon ta confirma na pueblo cu ta gobierno ta controlando parlamento y loke nan bisa of loke cu nan kier, tin cu wordo haci.
Esaki ta falta di caracter cu Tjon y su fraccion ta mustrando na pueblo, esta cu ta prome minister ta dicidi kico ta pasa, con e ta pasa y ki ora e ta pasa y e tres fraccionnan tin cu bay di acuerdo cu tur decision di gobierno.
Na momento cu prome minister y minister di finansa dicidi di hisa CFT pone riba Parlamento di nos pais, firmando un protocol cu ta permiti e comision financiero di supervision hasta manda bek un presupuesto cu parlamento lo aproba, ta confirma con gobierno a devalua henter e balor di nos parlamento.
Awor pa falta di curashi nos por scucha lider di fraccion di MEP ta papia cu ta gobierno di AVP a pone cu tin supervision financiero, lubidando cu gobierno di AVP su acuerdo pa cu normanan di presupuesto, lo a pone cu dia 31 di december venidero, CAFT lo a yega fin di su existencia na Aruba ora cu a cumpli cu normanan stipula.
Ta su gobierno di MEP, ta su lider politico awor a dicidi di yuda Hulanda pone no solamente parlamento un banda, pero trapa tambe riba nos constitucion y nos statuut cu e acuerdo aki y ta mas cu claro cu awor CFT a haya ainda mas poder ya cu e por actua y interveni cu bendicion di prome minister Evelyne Wever Croes, pafo di e constitucion y di statuut.
Ta di compronde cu sr Tjong no sa con pa actua y ta trata di mira den direccion di AVP pero e momento a yega pa como lider di fraccion nan lanta para contra di un gobierno cu no ta respeta nan como parlamentarionan serio, mas cu tur cos parlamentarionan integro,” Parlamentario Arthur Dowers a declara.
