“Meta di un politica etico y servicio publico semper mester ta relata na un causa y resultado HUSTO pa un y tur. E BON COMUN lo mester ta punto di orientacion, e compas moral pa tur accion politico manera un strea na shelo. E “BON” ta relata cu e resultado mester ta POSITIVO, y “COMUN” ta relata cu e resultado postivo mester conta pa TUR HENDE, henter e pueblo”, cu e mensahe aki líder di partido AVP, mr. Mike Eman ta pasando bario pa bario.
Den e ultimo encuentro di bario na Pos Abao ciudadanonan a scucha y comparti e mensahe aki cu un sentido di speranza cu Aruba por conoce un RENACIMENTO di un gobernación HUSTO. “Y no ta gobernación so mester conoce un cambio, mr. Mike Eman ta enfatiza den su mensahe, pero henter modelo económico di Aruba mester worde poni den e claridad di luz di un día nobo”. Meritocracia tambe ta laga miles di ciudadanonan atrás sin ta comparti hustamente den oportunidadnan. Hopi pa algún y poco of nada pa e massa tambe ta creando un sociedad inhusto, e líder di AVP, mr. MIKE EMAN ta expresa cu preocupacion. Na mesa di un DIALOGO NACIONAL mester revisa y analysa di nobo con pa haci e correccionnan pa por logra E BON COMUN ta e CONVICCION di mr. Mike Eman.
EMAN ta splica cu for di principio di pensamento riba politica y servicio publico a busca un cuadra di referencia etico y husto pa ta e guia y e cuadra dentro cual ta duna contenido na accionnan di politica y servicio publico. Pensadornan profundo desde principio di politica a pensa hopi riba e pregunta fundamental aki. Nan a bin na e conclusion cu eherce politica pa un pueblo su bienestar, su destino y futuro mester ta relata na locual nos Creador lo desea pa humanidad: eherce esfuerzo pa bida riba tera worde realisa mas hopi posibel den imagen di Reino di Dios, unda HUSTICIA Y AMOR PROHIMO ta prevalece. Cu e strea di guia aki e pensadornan a conecta eherce politica na e concepto di BON COMUN (Bonum Commune; El Buen común; Algemene Welzijn; Common Good).
E principio di BON COMUN ta dirigi su mes riba e condicionnan cu ta necesario pa un persona y comunidad por FLORECE y por FORTALECE e BON COMUN. E condicionnan aki por varia, nan por ta di diferente índole, for di condicionnan practico na un banda, manera: alimentación, panja pa bisti, trabao y empleo, entrada y por ehempel salud y educación.
Na otro banda e florecimiento di e BON COMUN ta garantiza tambe derechonan y obligacionnan intangible manera ta libertad di conciencia, libertad di religión y por ehempel derecho pa expresa y organiza nos mes. Es decir e BON COMUN ta aspira un conhunto di factornan cu ta permiti e persona, su famia y comundidad realisa mas plenamente y mas fácilmente PROGRESO PA UN Y TUR den HARMONIA y cooperación cu otro.
Mr. Mike Eman ta mustra cu asina e BON COMUN ta un strea di guía continuo pa e dirigente, pueblo, comunidad y ciudadano tin un punto di orientacion a base di cual nan por desaroya y mehora nan mes, construyendo un mundo bon y comun cu sentimiento, cu conexión, visión y futuro.
Awe e meta di accionnan BON ta worde lubida y tortura pa decisionnan cu ta haci mas malo cu BON. Y awe e meta cu resultado positivo mester worde busca pa tur hende, pa nan ta COMUN ta worde viola y a bira cu ta pa algún so tin prosperidad. Gobierno ta culpabel pa esaki. Pero tambe nos modelo económico su resultado ta for di balanza, un top chiquito cu hopi riqueza y miles bibando na rand of den pleno pobreza. Pensamento meritocrático ta pone exitosonan pensa cu nan éxito ta mereci pa nan esfuerzo y esnan cu a keda atrás no a esforza nan mes suficiente. Esaki ta crea un sociedad inhusto di “winners and loosers”.
E líder di AVP, mr. MIKE EMAN ta bisa cu tur hende exitoso tabata tin un of otro circumstancia na nan favor. Ningún hende ta exitoso plenamente basa únicamente riba nan merito. Pesey esnan cu no tabata tin e condicionnan favorable aki y suerte di vida mester tin un sociedad husto pa reconoce nan aporte tambe, con chiquito cu e por ta den sentido macro economico, pasobra por ehempel sin esun cu ta traha canto di caminda no tin un Aruba limpi y bunita pa otro por capitalisa riba dje. Sin e enferemera e dokter-specialista su so no por cura e patient. COVID, tabata prueba di esaki. E edificio no ta worde traha cu bloki y cement so, pero mester di e metsla y ponedo di bloki. E mundo meritocrático ta perde esaki for di bista y ta biba den nan bubbel cu nan a crea tur locual ta nan éxito. Sin e maestra di scol nos lo no tabata tin profesionalnan pa juda empresanan grandi den nan éxito. E BON COMUN ta producto di trabao, sudor y talento di tur !
“E BON COMUN ta un condición sagrado cu mester worde garantisa y realisa pa un PUEBLO, COMUNIDAD y un PERSONA. “Awe mas cu nunca nos tin e tarea pa trece bek política y servicio publico riba e rumbo di orientacion ETICO y HUSTO aki cu ta e BON COMUN. Ban haci e strea di guia aki atrobe nos punto di orientación”, ta e mensahe cu e líder di AVP mr. Mike Eman ta compartiendo den barionan. .
