Parlamentario Richard Arends ta participando den reunionnan di IPKO cu ta tumando luga na Hulanda. 

Den e prome dianan tabatin reunionnan bi-partite, mientras cu ta sperando pa den e siman cu ta bini papia riba entre otro e geschillenregeling den Tweede Kamer. 

Entremedio nan lo sigui cu e parti di lobbymento. Aruba a entrega un concepto di e cambio di e Rijkswet, cu tur partido representa den Parlamento di Aruba ta para su tras. Ta un alternativa pero tambe e ta honra e palabracionnan haci na 2010 y 2015 pa loke ta trata Corte di Arbitrahe, di disputanan den Reino cu ta haci falta asina tanto den Reino Hulandes.

Riba mesun liña

Segun Parlamentario Arends, e ultimo simannan su coleganan tabata na Hulanda tambe. Nan a sondea pa mira kico ta e ‘common grounds” entre e islanan, pero tambe cu Parlamentarionan Hulandes y a logra esaki. Parlamento di Aruba a pone esaki riba papel y a tuma nota cu e Comision Central di Corsou no a acepta e proposicion di Aruba. Nan kier explora mas oportunidad. Pa Aruba, loke tin riba papel, ta un destilacion di loke a palabra y loke a palabra recientemente, pero tambe for di 2010, cu mester bin un Corte independiente pa settle disputa.

Relacionnan no ta den su miho momento

Aruba ta pasando den un situacion caminda cu por mira e ultimo tratamento di Ley di Supervision Financiero. Mientras cu Gobierno di Aruba tabata tin palabracionnan, fraccionnan cu ta sostene Gobierno a opta pa cambia henter e Ley di Supervision Financiero den su esencia, convirtiendo e Ley di Supervision Financiero den simplemente un ley cu ta regla un supervision financiero. No e supervision financiero caminda e Gobierno actual a palabra pa prolonga esaki. Esaki a crea, Arends ta bisa, e desapunto y tambe e incomprension di parti di Hulanda. A tuma nota cu diabierna, ya caba Den Haag a cuminsa saca su prome señalnan despues di dos siman. Un ley cu por cierto ainda no a wordo ratifica door di Gobernador, algo hopi inusual, caminda un ley cu fraccion di AVP, pa motibonan obvio, tabata contra di e cambionan aki.

Pero un ley cu a wordo aproba den un proceso democratico, ainda ta pega den Gobierno, no ta wordo treci dilanti pa Gobernador firme. Partidonan den coalicion ta hopi keto den esaki, mientras cu nan a trece dilanti un amienda, cu ta cambia e ley, haciendo uzo di e derecho di Parlamento.

Ta mas cu dos siman caba cu e ley ta na Gobierno pa wordo aproba y wordo manda pa Gobernador di Aruba pa e tambe firma esaki, pa loke ta e parti di amienda.

“Por mira mientras tanto cu CFT a aumenta su tono, a cancela e bishita cu tabata tin cu Gobierno y e Comision Fiho di Parlamento. Esaki ta sigui pa e carta cu a wordo manda, caminda cu nan ta menasa Aruba di bin cu un aanwijzing, segun e competencianan cu CFT tin riba e ley vigente cu ta e ley di LAft bieu. E ley nobo no a wordo ratifica ainda.” Awor basa riba e autoridad y competencianan cu e Ley di Supervision Financiero bieu, ta menasando Aruba pa un aanwijzing. Esaki ta wordo mina poco poco y un biaha mas perhudicando no solamente un Gobierno of un Parlamento, pero perhudicando pais Aruba completo, e Parlamentario di fraccion berde Richard Arends a bisa.

Speransa

Fraccion di AVP semper ta percura pa tin nan propio reunionnan tambe. Apart di e agenda oficial di IPKO, tambe ta mira e caso. AVP kier lo miho pa Aruba. E disertacion cu Arends a trece den Parlamento, mester a pone discusionnan academico un banda y yega na un solucion practico, na beneficio di Aruba. Esaki sin embargo no a duna fruto. Pero ta sigui duna nan input positivo y constructivo pa wak si por yega ainda pa kibra e impasse cu tin awor aki entre gobierno di Aruba y gobierno di Hulanda.

Parlamentario Arends ta bay topa cu politiconan Hulandes fuera di e reunionnan di IKPO.