Den presupuesto 2018 por a tuma nota cu sector colectivo lo no mustra un deficit den e añanan nos dilanti. “Sector colectivo ta inclui e fondo di pensioen di behes, SVB,” Sr. Richard Arends, parlamentario pa fraccion di AVP, a splika. “E posicion solido di e fondo aki como parti di e sector colectivo ta danki na e reformanan cu a wordo acorda hunto cu e partnernan di Dialogo Social den añanan anterior. Awe nos grandinan por goza di un entrada sigura riba termino largo.” E parlamentario a sigui bisa cu reformanan aki tambe a percura pa e futuro pensionadonan por tin un pensioen garantisa.
Durante gobernacion di Gabinetenan Mike Eman I y II, hunto cu partnernan social a sinta na mesa y yega na reformanan structural pa fondonan di pensioen. E prome fase di reformanan na 2011 a reforsa e posicion financiero di e fondonan maneha door di SVB riba un termino corto, mientras cu e di dos fase na 2014 a caba di salbaguardia fondonan di pensioen y sigura asina e pensioen di nos grandinan. Pa mitiga e presion di termino largo riba e fondonan di AOV, ya caba na 2012 a introduci e Flex-Pensioen y e pensioen general obligatorio garantisando asina tur trahador den sector priva un pensioen adicional riba e pensioen di SVB garantisando asina un entrada den futuro pa e trahadonan di sector priva cu por a conta solamente cu e pensioen di AOV.
Sector colectivo ta consisti di gobierno, Serlimar, Universidad di Aruba, ATA, como tambe e fondonan di seguro medico AZV y e fondo di pensioen SVb. Den presupuesto 2018 gobierno a confirma cu lo logra un saldo positivo di sector colectivo te cu aña 2021. “Esaki ta nifica cu Gobierno segun su propio cuadro financiero no ta contemplando reduccion di edad di pensioen pa 60 aña manera cu a ser prometi den campaña, sino esaki lo a refleha di biaha den e resultadonan” Sr. Arends a bisa. “Reduccion di edad di pensioen lo nifica un aumento di prima y un contribucion directo di gobierno den fondo di SVb, cual por cierto tampoco ta inclui den presupuesto 2018.” E parlamentario a argumenta cu reduccion di edad di pensioen lo trece e fondo di pensioen di behes na peliger, como tambe pensioen di nos grandinan y e futuro pensionadonan.
Gobierno a anuncia cu e compensacion cu pensionadonan mester ricibi na momento di aumenta BBO/BAZV lo consisti di e.o. un reduccion di prima di AZV cu 4%. E reduccion aki mester wordo cubri sea door di Gobierno cu un contribucion adicional di mas of menos 20 miyon di florin den e fondo di AZV, of sea for di e reservanan di SVb. “E aumento di BBO/BAZV ta garantisa den presupuesto. E pregunta ta keda con Gobierno lo compensa nos grandinan, mirando cu e contribucion pa cubri e reduccion di prima no ta inclui den presupuesto, ni tampoco den e cuadro financiero di sector colectivo cual SVb ta forma parti di dje”. Parlamentario Arends ta finalisa bisando cu e ta spera cu Gobierno a recapacita y di e manera aki evita un un decision cu consecuencianan desastroso pa e pensionadonan y nos futuro pensionadonan, como tambe nos mercado financiero.
