Fraccion di AVP pa algun tempo caba a bin ta mustra cu Gabinete Wever Croes ta decidido pa no mira reapertura di e refineria di San Nicolas keda realisa ya cu tin interesnan grandi cu sponsor- y famianan ta luchando pa haya for di e proyecto aki.
Lider di fraccion di AVP den Parlamento, Marlon Sneek a señala cu e prome gran meta den e proceso aki, a wordo logra pa Prome Minister kende ta responsabel pa e refineria, ora cu Director di RdA, sr Alvin Koolman, a entrega su retiro na Prome Minister.
“Nos di fraccion di AVP a bin ta mustrando riba e desaroyonan cu tin den e refineria pa algun tempo caba, caminda e lucha di gabinete Wever Croes, no tabata pa logra reapartura di e refineria, pero con ta parti e diferente sectornan cu si ta gana placa como empresa di Gobierno.
Entre otro e FMSA cu ta encarga pa e proceso di fuel avionnan grandi na aeropuerto, a bira e centro di e lucha grandi entre sponsornan di campaña e partidonan MEP y POR y awor cu a logra cu Director Koolman a dicidi di bula afo, e lucha pa e compania aki ta cuminsa den tur su gloria.
No por mira e desaroyo aki di otro forma, caminda nos tin un Prome Minister Evelyn Wever Croes, kende tabatin cantidad di compania dispuesto pa habri e refineria, nunca realmente a atende su mes cu e refineria y a para un banda mira con cosnan ta bay, lagando otronan haci e trabou di presion riba Director di RdA.
Otro señal bon cla ki rumbo gabinete Wever Croes tabata hibando e refineria di San Nicolas, tabata na momento cu a otorga un permiso di fuelmento di avionnan chikito, na un sponsor di partido POR caminda eynan caba tabatin indicacion cu FMSA lo no bay keda un compania di pueblo manera ta e caso aworaki.
E gobierno aki for di su salida a ehecuta un vision di ranca for di cartera di pueblo cu medida pero di otro banda a acomoda sponsornan di campaña cu diferente gesto y famianan tambe y e proceso aki ta tumando luga actualmente cu RdA.
Prome Minister mes bou di kende responsabilidad di e refineria ta cay, no a mustra ningun tipo di interes pa sigura cu e proyecto aki lo wordo logra pero a para un banda, laga famia y sostenedornan di su partido bay atende cu e refineria, ya cu e vision di su gobierno, tabata totalmente otro.
Siman pasa caba a Sali na conocemento pueblo maniobranan straño cu ta tumando luga den e refineria, caminda oficina di Papa di Prome Minister, ta bay bringa un demanda contra RdA cu su ruman homber kende ta maneha un pomp di gasolin na Savaneta como su representante legal y ta bin resulta cu mesun oficina di Papa di Prome Minister, ta Sali na defensa di interes di RdA.
Un conflicto di interes di otro mundo caminda e demanda tabata exigiendo un suma di un miyon florin caminda nos ta mirando cu retiro di Director Koolman e siman aki, ta habri caminda pa e dos partidonan envolvi, esta e mesun famia Croes di Prome Minister, logra un acuerdo y famia Croes sali gana for di tur e situacion aki.
Mientras tanto y a caba tin informacionnan cu diferente parti di tereno di e refineria cu ta bou maneho di RdA ya caba a wordo pidi y ta den proceso di otorgamento mientras cu e lucha pa tuma e seccion di FMSA, ta tumando luga caminda sponsornan ta buscando pa gara e compania di pueblo aki mientras cu tin famia Croes cu tambe ta den e lucha pa pone man riba e FMSA aki.
Kico tin pa pueblo for di tur e desaroyo aki den RdA, mas medida ta na caminda, mas rancamento di placa for di cartera di pueblo ta na caminda mientras cu sponsor- y famianan Croes, ta esunnan cu ta bay Sali beneficia di tur cos,” lider di fraccion Marlon Sneek a mustra.
‘
