Den luna di juli ultimo un delegacion di Parlamento di Aruba a participa den tratamento di e rijkswet encuanto areglo di disputa den Tweede Kamer. Prome cu proceso legislativo continua den Eerste Kamer, Raad van State a informa Gobierno Hulandes pa reconsidera seriamente ley di areglo di disputa. Particularmente e amienda presenta pa delegacion di Aruba.

E desaroyo aki ta demostra y ta un ehempel con e sistema democratico vigente den Reino tin cu traha compara cu loke a bin ta tumando luga recientemente pa loke ta e ley di supervision financiero unda Parlamento a aproba un amienda cu sosten di Gobierno y awor gobierno di Reino a pidi pa su anulacion,” Parlamentario Richard Arends a declara.

 “Manera ta conoci Parlamento di Aruba tabata riba un liña indicando cu e areglo di disputa manera cu el a wordo presenta, no tabata cumpli cu acuerdonan haci den IPKO pero tampoco cu palabracionnan haci na nivel di gobierno,” miembro di Parlamento, como tambe miembro di delegacion,  Sr. Richard Arends, a mustra durante conferencia di prensa di fraccion di

AVP.

Tweede Kamer a aproba e amienda ‘Thijssen cs.’ caminda ta institui un seccion nobo den Raad van State, caminda na momento cu tin un disputa riba interpretacion huridico di Statuut of  di otro reglanan Constitucional den Reino, e lo por wordo treci na e Afdeling Koninkrijksgeschillen aki. E afdeling aki lo por duna den caso di un areglo di disputa un conseho na Conseho di Minister di Reino cu den rasonnan hopi excepcional, lo por desvia di e recomendacion hasi. Raad van State sinembargo a desconseha esaki, pasobra e  por trece henter e areglo di disputa den peliger y ta considera esaki no deseabel. Raad van State ta conseha gobierno Hulandes pa reconsidera e henter e Rijkswet.

Gobierno Hulandes tin dos opcion: gobierno por retira e ley aki y consecuentemente lo no tin ningun areglo di disputa; of ta laga e proceso sigui pa Eerste Kamer. Eerste Kamer por dicidi di no acepta e ley aki manera cu el a wordo presenta y mande bay Tweede Kamer pa e wordo atende di nobo.

“Nos ta sperando pa mira kico lo bay ta reaccion di Gobierno di Reino riba e asunto, pero hecho ta Rijkswet Geschillenregeling manera cu el a wordo aproba den Tweede Kamer, su chens pa e bira un realidad, ta hopi hopi chikito na e momentonan aki,” Parlamentario Arends a indica.