Miembro di fraccion di AVP den Parlamento, drs Mervin Wyatt Ras, durante conferencia di prensa a atende cu e conseho di Raad van State relaciona cu COHO.
COHO ta e Caribisch Orgaan voor Hervorming en Ontwikkeling. Den e periodo di COVID, Hulanda a pone como condicion pa Aruba acepta 2 ley di Reino, a cambio di ayudo financiero pa un par di luna. E 2 ley di Reino ta COHO y RAft (Rijkswet Arubaans Financieel Toezicht). Evelyn Wever-Croes a acepta e 2 leynan di Reino na mei 2020 caba, prome cu e deadline cu Hulanda a duna e paisnan den Reino. El a acepta sin consulta cu Parlamento ni gremionan commercial ni gremionan sindical. El a djies duna informacion di un banda sin duna espacio pa dialogo ni pa trece cambionan den loke el a trece padilanti. Awor ta sali na cla cu den conseho di Raad van State ariba e Rijkswet COHO ta ser indica cu
e Rijkswet COHO no ta cuadra cu locual a ser bisa y cu e ta impugna na nos autonomia.
Raad van State ta conseha Secretario Raymond Knops pa no manda e ley aki pa e paisnan pasobra e ley ta ‘schiet tekort’. Na mes momento Raad van State ta mustra cu e ley aki ta mina autonomia di e paisnan. COHO a presenta un “Landspakket”, cual ta encera diferente medida y un “uitvoeringsagenda”, esta un agenda di ehecucion di tur e medidanan. Gobierno di Aruba ciegamente a bai di acuerdo cu esaki.
Miembronan di COHO tin tur autoridad. Nan mes por actua y haci investigacion riba nan mes na nos pais y den nos departamentonan. Por ehempel durante un reunion den Parlamento gobierno a informa nos cu Hulandesnan ta bin haci investigacion di empleadonan publico y cu nan por actua tambe den esaki.
COHO mes tambe por duna subsidio.
Raad van State den su conseho ta haya cu e asercamento aki no ta pas y cu e ta mina autonomia di nos pais. Segun e conseho COHO tin autoridad cu ta bai hopi leu.
Raad van State ta cuestiona e independencia di COHO cu ta fungi bao di regie di minister di e ministerio di Binnenlandse Zaken en Koninkrijksrelaties (BZK). Pues e ministerio aki di Asuntonan Interior y di Reino ta bai para riba gobierno di Aruba y ariba Parlamento. Esey no por segun Raad van State.
COHO e ora tin tur sorto di poder pa bay actua y pa bay tuma decisionnan cu locual no mag di ta asina y ademas gobierno Hulandes lo por cambia tambe tur e diferente condicionnan cu e tin.
Tambe den COHO tin representantenan cu no ta di nos pais, dor di cual nos no tin nada di bisa den e board aki. Tur esaki no por, den cuadro di nos leynan, nos Statuut, cu ta proteha nos pa loke ta trata nos derechonan constitucional.
Fraccion di AVP a critica e hecho aki y nos ta haya cu no mester a acepta COHO, manera gabinete Wever Croes a haci asina lihe.
Nos lider di partido AVP, mr. Mike Eman, ya for di luna di augustus caba di 2020, a manda un Memorandum titula “Balans tussen hart en verstand” pa Prome Minister Hulandes, Mark Rutte, den cual el a expresa su desaprobacion pa cu esaki. Pues partido AVP y fraccion di AVP den Parlamento a haci nos trabou relaciona cu COHO y nos a bay contra di COHO.
Awe gabinete Wever-Croes no solamente a hinca nos cu COHO sino tambe cu un otro Rijkswet Arubaans Financieel Toezicht (Raft).
Nos lo sigui haya sosten financiero, pero e condicion lo tin consecuencianan devastador pa nos autonomia, nos economia, nos salubridad publico, enseñanza, justicia y calidad di bida di nos cuidadanonan.
Ya caba den acuerdonan cu Hulanda, segun e landspakketten, a corta 5% den cuido medico. Nos profesionalnan den cuido ta hayando menos entrada y cierto tratamentonan medico no por sigui manera mester ta y esaki sin duda tin efecto ariba salud di nos poblacion, locual ta inaceptabel.
For di reaccion di minister Knops riba e conseho di Raad van State cu a “lek”, por conclui cu Evelyn Wever-Croes tabata na haltura di tur esaki, paso e minister a duna di conoce cu el a discuti contenido di e conseho di Raad van State cu e paisnan.
Awor Wyatt-Ras ta compronde dicon e Promer Minister a core bai skonde drenta den cuarentena e siman aki. Awor cu tur cos a sali na cla ta importante pa Minister Presidente duna cara y bin bisa Parlamento y nos pueblo kico awo?
Kico e ta bay haci awor cu Raad van State mes ta bisa cu COHO ta empugna cu nos autonomia? Ta momento pa Minister Presidente bin duna cuenta pakico el a bay di acuerdo cu esaki y bin informa con e ta bay cambia esaki.
Na momento cu AVP drenta gobierno lo bin cambio den e palabracionnan descabaya aki. Wyatt-Ras ta den espera di Minister Presidente pa e bin duna splicacion y e tuma un posicion contra di e situacion aki pa asina salvaguardia e autonomia cu tanto nos antepasadonan a lucha p’e, conhuntamente cu e otro islanan cu ta den mesun situacion, Parlamentario Mervin Wyatt Ras a declara.
