Tur cos ta mustra c’un biaha mas gabinete Wever Croes II, guia pa lider di MEP Evelyn  Wever Croes, a bolbe gaña pueblo  y cada bes e mentiranan aki, ta birando mas y mas serio, ya cu pueblo ta den desesperacion total cu loke ta pasando.

Asina e miembro di fraccion di AVP den Parlamento, Arthur Dowers a trece dilanti, mustrando cu e sorpresa di siman pasa ora cu cobransa di awa y coriente a yega na cas di ciudadanonan rond di Aruba, loke nan a mira tabata alarmante, loke pueblo a haya tabata un abuso di marca mayor di un gobierno cu no solucion pa ningun problema di pueblo.

“Al contrario e gobierno di Prome Minister Evelyn Wever Croes tin cinco aña castigando pueblo, castigando nos hendenan den un forma sin piedad, sin duna ningun pero ningun recompensa pa yuda nos hendenan, principalmente esunnan di menos entrada, un espacio pa hala rosea financieramente.

Algun siman of dia despues di a anuncia aumento di BBO te na 7%, siman pasa gabinete Wever Croes cu Prome Minister Wever Croes na cabes, a presenta den Parlamento pa informa riba e siguiente  pakete di medida, cual e biaha aki yama Landspakket, ya cu eyden tambe tin medidanan acorda pa Prome Minister di Aruba cu tin cu wordo ehecuta.

Ta tristo  topa cu ciudadanonan tur caminda, papiando di e abuso di aumento di prijs di awa y coriente, algo cu nunca nan a spera, algo cu nan a wordo sorprendi totalmente pa un aumento cu den hopi caso, a subi cu 100%, lagando tur hende c’un problema serio for di unda nan cu saca e placa aki, cu ya nan no tabatin pero cu awor nan tin cu saca di unda cu ta, pa duna WEB, esta pa duna gobierno.

Tur cos ta mustra cu ta pa e motibo aki tambe, practicamente  tur Minister ta huy pa exterior, supuesto pa  asuntonan di trabou cu Parlamento no sa di nan y otronan atendiendo reunionnan cu nan por a laga otro oficialnan di gobierno atende cu esakinan.

Pero biahando riba custia di gobierno, ta biahando riba custia di pueblo ya cu ta placa di pueblo esaki ta pero net e mandatario responsabel pa maneho di WEB, pa di dos ocasion den corto tempo, a biaha pa Ecuador, buscando un solucion pa haya crudo mas barata pero lubidando di bisa pueblo cu e solucion aki no ta a corto plaso ya cu ni gobierno y ni WEB tin placa na e momentonan aki pa cumpra e crudo barata di Ecuador.

Ta trikinan pa pueblo lubida loke gabinete Wever Croes II ta haciendo cu pueblo su cartera, mientras cu famia y amigonan cu a wordo tuma na trabou na gran escala, ya caba Prome Minister Evelyn a anuncia cu no ta kita ningun hende di trabou.

Luna di October ta un luna cu pueblo di Aruba ta drenta su ambiente di Pasco, sinembargo cu algun cuenta hopi pisa pa paga di awa y coriente, remedi pa paga cu no ta wordo cubri mas pa AZV, cierto tratamento nan medico pa paga, practicamente lo no resta algo pa celebra Pasco manera semper a celebra esaki.

Gabinete Wever Croes ta destruyendo pueblo di Aruba financieramente ya cu Minister di  Financia, Xiomara Maduro, ya caba a anuncia cu aumento di BBO ta pa drecha caminda pa introduccion di BTW cu lo caba di choca pueblo su cartera den un forma nunca antes bisto riba nivel gubernamental,” Parlamentario Arthur Dowers a declara.